Университетни атын айтдыргъанды

Яникойчу Хутуйланы Тамерлан Юг федерал университетни Инженер-технология академиясыны Таганрогдагъы Компьютер технологияланы бла информация къоркъуусузлукъну институтуну 3 курсуну студентиди. Кёп болмай ол тенги Дмитрий Мингалёв бла бирге «Жаш устала» деген ючюнчю вузла аралы чемпионатха къатышханды. Жашла «Разработка решений с использованием блокчейн технологий» деген проектни хазырлагъандыла. 

Чемпионатха къыралыбызны 73 бийик билим берген окъуу юйюнден 500 жаш бла къыз къатышып, илмуда жетишимлерин ачыкълагъандыла. Ала кёргюзтген ишлени  500-ден артыкъ специалист сюзгендиле. 

Эришиуню ахыр кесеги Москвада ВДНХ-да ётгенди. Юг федерал университетни келечилери анда жетишимли болгъандыла. Студентлени проектлери бир алтын, эки кюмюш эм юч да доммакъ майдаллагъа тийишли болгъандыла. «Алтынны» уа вузгъа Хутуйланы Тамерлан бла Дмитрий Мингалёв къытхандыла. 

Суратда: Хутуйланы Тамерлан (солдан онгнга  экинчи) ЮФУ-ну командасыны санында.