Сайлагъан усталыгъына кертичиди

Биринчи кере биринчи классха келген кюню хар кимни да эсинде болур. Тёгерек омакъ кийиннген  сабийледен толу, кёп гюлле, дауур- жабы.  Сен танымагъан бир адам, ананг тутуп тургъан къолунгу кесини къолуна къысып, алып кетеди.  Биринчи устазынг. Жаланда къолунга угъай,  гитче жюрегинге жылыу, ырахатлыкъ салгъан,  сени алгъа атлагъан жолунга себеплик этген адам.  

Бечелланы Ануарны къызы Аминатны  да аны окъуучулары жаланда ол сезимле бла сагъыннганларына мен ишексизме. Ол кёп жылланы  устаз болуп ишлейди, Тёбен Чегемде сабийлеге билим бериуге уллу  къыйын салгъанладан бириди. Ёсюп келген тёлюню ариу къылыкълы болургъа, адеп-намысха  юйретиуге да юлюшюн къошады. Андан болур, бу элде анга уллу,  гитче да сый бергенлери, хурмет этгенлери.

Аминат кеси да Тёбен Чегемде ёсгенди, школну да мында бошагъанды. Ол университетден сора элге устаз болуп келгенде, эсимдеди  анга бизни классны башчылыкъ этерге бергенлери. Жаш адам болгъаны ючюн  аны бла ушакъ этген бизге бек хычыуун  эди. Аны себепли дерсле бошалсала да, школдан кетерге ашыкъмагъанбыз – аны тёгерегине жыйылып, хапар айтыучу эдик. Андан бери эки жыйырма жылгъа жууукъ болду, Аминат Ануаровна уа сайлагъан усталыгъына кертичилей къалгъанды. Бюгюнлюкде мектепни директоруну экинчиси болуп ишлейди. Кесине, башхалагъа да  сурамы уллуду. Не заманда да аны ишини юсюнде кёресе. Окъуучулагъа артыкъда бек къайгъырады, аланы  юйде халларындан да хапары барды.

Аны ишине республиканы оноучулары, КъМР-ни Жарыкъландырыу, илму эмда жаш тёлюню ишлери жаны бла министерствосу бийик багъа бередиле. Ол аланы сыйлы грамоталары  бла кёп кере саугъаланнганды, аладан ыспас тапханды. Алай Аминатха бек уллу саугъа, махтау да   ол окъутхан сабийлени  жер-жерледе  бет жарыкълы урунуп, атларын иги бла айтдыргъанларыды.

Аны биргесине ишлегенле да,  ол барыбызгъа да ахшы насийхатчыды, къайгъырыулу нёгерди, тенгди дейдиле. «Къууанчыбызда, бушууубузда да биргебизгеди. Не жумушубузгъа да уллу кёллюлюк этмей, керти жууукъ адамыбызды»,- деп, ыразылыкъларын билдиредиле. Школну директору Сарбашланы Мустафаны жашы Альберт анга былай багъа бергенди: «Билими уллуду, аны бла  ишлеген бизге женгилди.  Ишине жууаплы кёзден къарайды, бирсиледен сурагъаны да олду. Аны себепли не уллу жумушну да анга ышанама,  аны айыпсыз  толтурлугъуна ишексизме».
 

Мен да , школда окъугъан жылларымы эсге тюшюре, Аминат Ануаровнагъа ыразылыгъымы билдиреме. Багъалы устазыбыз, саулугъугъузну, заманыгъызны аямай, бизге билим бергенигиз, тюзню, терсни айыра билирге юйретгенигиз ючюн сау болугъуз дейме!