Электрон амал бла тёлеу къыйматлыды

Россейде пандемияны кезиуюнде электрон амал бла  тёлерге сюйгенлени санына танг къошулгъанды.  Аны бла байламлы къысха заманны ичинде жамауатха, бизнесге, къыралгъа да дистанция амалгъа юйренирге тюшгенди. 
Пластик  картала иш хакъны тёлеуде да  тири хайырланадыла. Банкла клиентлерине энчи кёзден къарагъанлары уа анга  бютюн себеплик этеди. 

Коронавирус жайылыргъа къоркъуулу кезиуде адамла  эшикге чыгъаргъа артыкъ  излемейдиле. Россейни Банкы алагъа тынчыракъ болурча кенг амалланы хайырланады. Ол санда адамланы эм бизнесни да  аллында   борчун толтурады. 
Россейде былтыр электрон тёлеуле 5,2 процентге ёсгендиле.   Шимал Кавказ федерал округда быллай система уллу айнымаса да,  сагъынылгъан кезиуде  мында да ёсюм эсленеди.   Ол санда  Къабарты-Малкъарда  ол  5,6  процентге жетгенди. 

Болсада  адамланы жыл санларын да эсге алыргъа керекди. Сёз ючюн, отуз жыллары толмагъан жаш адамланы 45 проценти карталаны тири хайырлана эселе, аладан   таматаракъла бла абаданланы  ол амалгъа   13 проценти бюсюрейди. 
Былтыр тёртюнчю кварталда картала бла тёлеуню асламысы аш-азыкъ продукция нада  башха товарла алгъанларында этилгендиле.

Сатыу-алыуда  электрон амал кюч ала баргъаны бла банклагъа тюрлю-тюрлю операцияланы эсеплерге тынч болады.   Алай эсе уа,  налог тёлемез  ючюн хыйлалыкъ этерге излегенле да азыракъ боллукъдула.