Эркинликлеригизни билип турууну талай амалы барды

Пенсия фондда инсанны энчи лицевой счёту, кёпле суннганча, банкдагъыча тюйюлдю - анда ахча угъай, адамны пенсия эркинликлерини юсюнден билдириу  сакъланады эмда ол  жорукълагъа тийишлиликде къаты къорууланады. Бусагъатда аланы юслеринден талай амал бла билирге боллукъду:

Энчи кабинетни юсю бла

Анда жыйылгъан пенсия балланы, страховой стажны, урунуу кезиулени, ишлеген жерлеригизни, иш бла жалчытхан организация сизни ючюн этген тёлеулени, иш хакъыгъызны юсюнден битеу шартла  бардыла.

Андан тышында, сервисде пенсия калькулятор бла хайырланыргъа, аны болушлугъу бла  пенсияны ёлчемин тюрлендирирча мадарланы юслеринден билирге да боллукъду. Жангыз да къырал жумушланы сайтында - www.gosuslugi.ru бла идентификацияны бла аутентификацияны (ЕСИА) бирикдирилген системасында эсепге тюшерге керекди.

Клиент службаланы болушлукълары бла

Аны ючюн фондну жер-жерли бёлюмюне барып, заявление жазаргъа тийишлиди, биргегизге паспортугъуз болургъа керекди. Жууапны 10 кюнден сора берликдиле.

www.gosuslugi.ru порталны юсю бла

Аны ючюн къырал эм муниципал жумушланы порталында эсепге тюшерге борчлусуз. Аны «Электрон жумушла» деген бёлюмюнде «Энчи кабинетге» кодну алгъандан сора, «Россей Федерацияны Урунуу эм социал  къоруулау министерствосу» деген жазыуну, анда уа «Россей Федерацияны Пенсия фонду» бёлюмню сайлагъыз. Анда онлайн халда счётугъузда болгъан информацияны кёрлюксюз.

Банкда

Бу амал бла хайырланыр ючюн, алгъа сиз клиенти болгъан банк быллай жумушланы тамамлагъанын бла къалгъанын билигиз. Аны келишими бар эсе, информацияны кредит учрежденияны специалистинден къагъытда неда банкоматда электрон халда алыргъа боллукъсуз.

Ахшы жангычылыкъладан бири - быйылдан башлап, Россейни Пенсия (ПФ) фонду 45 жылдан абадан адамлагъа пенсия счётларыны, стажларыны эм боллукъ страховой пенсияларыны ёлчемини юсюнден юч жылгъа бир кере билдире турлукъду. Аны юсюнден билдириу  фондну сайтында инсанны энчи кабинетине неда къырал жумушланы порталында кабинетине жиберилликди.

 Адам ол шартлада жангылычла  эслесе, фондха аланы тюзетиуню юсюнден тилек къагъыт  жазаргъа, шагъатлыкъгъа документлени да берирге керекди. ПФ, иш бла жалчытхан организациялагъа, архивлеге, башха тийишли органлагъа сурамла ийип, аланы тинтирикди эмда аланы  эсеплерине кёре, лицевой счётха тюрлениуле кийирликди.