Бизнес бла кюрешгенлени жарсыуларына эс бура

Предпринимательство бла кюрешгенде адам къаллай тыйгъычлагъа тюберге боллугъуну эмда бу ишни энчиликлерини юсюнден Май районда бардырылгъан  «тёгерек столда» айтылгъанды. Анга КъМР-ни Энергетика, тарифле эмда жашау журтлагъа надзор этиу министерствосуну, Сатыу-алыу палатаны, «Бюро-Контур» компанияны, жер-жерли администрацияланы, предприятияланы, организацияланы, жамауат биригиулени келечилери эмда бизнесменле къатышхандыла. Жыйылыуну бардырыугъа Къабарты-Малкъарда предпринимательлени эркинликлерин къоруулау жаны бла Уполномоченныйни аппаратыны специалистлери себеплик этгендиле.

Тюбешиуде кёп темала сюзюлгендиле. Предпринимательлени контроль-касса техниканы хайырланыуну энчиликлерини, кир-кипчикни ташыуну багъасыны эмда башха затланы юсюнден сорууларына налог службаны, башында сагъынылгъан Аппаратны эмда «Экологистика» регион операторну келечилери толу жууапла бергендиле.

«Тёгерек столну» ахырында, аны кезиуюнде кётюрюлген жарсыуланы эмда аланы тамамлау жолланы юсюнден Уполномоченныйни атына обращение хазыр этилгенди, деп билдиргендиле районну жер-жерли администрациясындан.