Бёлюмлени асламысында ёсюм эсленеди

Быйыл Къабарты-Малкъарда биринчи кварталны эсеплерине кёре, промышленный  производствону индекси (ИПП) 110,4 процентге жетгенди. Эм уллу ёсюм 22  жарашдырыучу бёлюмде болдурулгъанды, аладан 17 КъМР-ни Промышленность эм сатыу-алыу министерствосуна бойсуннганладыла.   Быйыл биринчи кварталда жарашдырыучу  производствода ёсюм 8,5 процентге жетгенди.  Ол бирси жылладан иги да уллуду. Бу бёлюмде компьютерледен, электрон эм оптика бла байламлы абериледен 4,5 кереге кёп чыгъарылгъанды. 

Электрон оборудованияны ёлчеми 139 процент, темирден этилген затланы (машинадан бла оборудованиядан къалгъаны)  112,5 процент,  темир изделияланы - 121, 5 процент,   къумачны - 142,9 процент, кийимлени - 1,6 процент, къагъыт эм къагъытдан этилген затланы - 122,5 процент болгъанды.   

Башында сагъынылгъан эсеплени толтурургъа «Севкаврентген-Д», «Нальчикни бийик вольтлу аппаратура чыгъаргъан заводу», «Кавказкабель ТМ», «Терекалмаз», «ЭлектроПроСервис», «Текстиль Индустрия», «Дарий», «БТК Групп Терек» эм «Эрпак» биригиуле аслам къыйын салгъандыла.  

Промышленность производствону айный баргъаны,   продукцияны дайым сатылгъаны  эм планда болгъан  инвестициялы проектлени жашауда тири бардырылгъаны  - алгъаракъда КъМР-ни Башчысыны къуллугъун болжаллы халда толтургъан Казбек Коковну республиканы валовый продукциясын (ВРП) эки кереге ёсдюрюрге деген  буйругъун  толтурургъа себеплик этген шартладыла. 

Быйыл биринчи кварталда розница сатыу-алыу    28,6 миллиард сомгъа жетгенди.  Ол былтыр бу заман бла тенглешдиргенде 7 процентге, буруннгу жылдан а 5 процентге асламды.  
Розница сатыу-алыуда быйыл биринчи кварталда  хар  адам 11018 минг сом жойгъанды. Былтыр а ол 10427 сом эди.