Врачла билимлерин ёсдюргендиле, онкология ауруулагъа да аслам эс бургъандыла

Кёп болмай Нальчикде Россейни  акушер-гинекология  обществосуну школуну (РОАГ)   перинатал медицина эм неонатология темагъа жораланнган жыйырма бешинчи   регион аралы  конференциясы болгъанды. Анга Шимал Кавказдан беш жюзден аслам специалист къатышхандыла, ол санда КъМР-ни саулукъ-сакълау министри Марат Хубиев да.

Жыйылыуда акушер-гинекология, неонатология бёлюмледен сора да, онкология, урология, терапия жаны бла темала  сюзюлгендиле. Спикерлени орунунда къыралда перинатал медицина жаны бла белгили  профессорла болгъандыла. Ала бюгюнлюкде багъыуда  хайырланылгъан амалланы, жангы тинтиулени юсюнден да айтхандыла. Ол санда, сабий биринчи жылында бегирек  къыйналгъан ауруулагъа да аслам эс берилгенди.

Жыйылыугъа къатышханла  Японияда басмаланнган  «Ананы бла баланы дневниги» бла саугъаланнгандыла. Кюнчыгъыш къыралда ол ауурлугъу болгъан тиширыугъа врачха биринчи келгенинде окъуна бериледи. Анга эсде къалырча медицина шартланы жазгъанлай турадыла.

Конференцияны чеклеринде бюгюнлюкде эм уллу жарсыуладан бирине – онкологиягъа - сакъ болуугъа жораланнган семинар да ётгенди. Аны чеклеринде онкогинекология эм маммология институтну таматасы, академик Лев Ашрафян бюгюнлюкде хар экинчи адам онкологияны хатасындан  ауушханын, аны ючюн ол башланнганын онкологладан бирсиле да тинте билирге керек болгъанларын айтханды. Бу жаны бла  акушер-гинекологла да тири ишлегенлерин   чертгенди.   

Тюбешиуледе къыралны белгили институтларыны бла клиникаларыны специалистлери  бла байламлыкъда ишлерча келишимле да этилгендиле. РОАГ-ны Школу кюн сайын врачны ишинде тюбеген проблемалагъа жууап тапдыргъан эм иги  билим бериу проектге саналады.