Жюз гектарда теплица комплекс ишленирикди

Кёп болмай  Чегем муниципал районну администрациясыны башчысы Юра Борсов  «Овощи Ставрополья»  биригиуню таматасы   Дмитрий  Мугер бла тюбешгенди. Ала  быйыл Чегемде 100 гектарда «Дары Кавказа» деген жемиш эм наныкъ ёсдюрген  республикада эм уллу теплица комплексни   ишлерча планны сюзгендиле.  Аны юсюнден бизге жерли-жерли администрацияны пресс-службасындан билдиргендиле. 

 - Бюгюнлюкде жангы технологияланы кючю бла  регионда жилеклени   Баксанёнокда 17 гектарда орналгъан  теплицада ёсдюрюп  кюрешедиле.  Алай жангы проектни хайыры бла  производствону иги кесекге  кенгертирге  боллукъду.  Аны къурулушуна  18 милиард сом чакълы  къоратыллыкъды.  Объектни  ишлерик   компания кесин ахшы жаны бла кёргюзтгенди, бу жаны бла  сынамы болгъан  биригиудю. Сёз ючюн,   Ставрополь крайда Марьинская  станицада 70 гектарда  ол  салгъан теплица  бюгюнлюкде  жетишимли мюлкледен бирине саналады, - дегенди  КъМР-ни Экономиканы айнытыу министри Рахайланы Борис. 

Жангы теплицада  бюгюннгю технологияла хайырланыллыкъдыла. Ол себепден  жылны узуну  жемишледен бла  наныкъладан экология жаны бла  таза 50 минг тонна тирлик жыйыллыкъды. Кесинде да  1500 адам урунурукъду.  Орта эсеп бла алып айтханда,   аланы иш хакълары 30 минг сомгъа жетерикди.  Планнга кёре, объектни  къурулушу быйыл тёртюнчю кварталда башланырыкъды. 
 

 

Магомедланы Сулейман.
Поделиться: