Къырал болушлукъну хайырындан ипотека ставкала азайгъандыла

«РосБизнесКонсалтинг» компанияны сайтында жазылгъанына кёре, пандемия бла байламлы банкла кредитлени алгъынча ёлчемде бермейдиле. 65 процентден аслам адам займны алалмагъандыла. Банклада кредит политиканы хар бёлюмде да бирча къатыландырмагъандыла. Эм аз ахча автокредитование жаны бла берилгенди: 2019 жылда 56,5 процент тилек къабыл кёрюлмеген эсе, былтыр а ол тарих 62 процентге жетгенди. Алай ипотекалагъа уа алгъа жылладан эсе кёбюрек ахча бёлюннгенди, аны юсюнден заявкаланы 71,3 проценти къабыл кёрюлгенди.

Кредит болумланы миллет банкыны маркетинг жаны бла таматасы Алексей Волковну айтханына кёре, къырал болушлукъну хайырындан ипотека ставкала азайгъандыла. Ол себепден ахыр тёрт жылны ичинде бу программа бла эм кёп инсан быйыл хайырланнгандыла. «Жангы ишленнген кёп фатарлы юйлеге льгота ипотека кийирилгени ючюн рынокга борчну тёлерге онглары болгъан адамла чыкъгъандыла», - дегенди ол.

Кредит болумланы «Эквифакс» банкыны таматасы Олег Лагуткин билдиргенине кёре, пандемия бла байламлы кредитлени бериу мартда бла апрельде азайгъанды.  1 ноябрьге ол 32,7 процент окъуна болгъанды. Кредитле аз берилгени, бек алгъа эпидемиягъа къажау мадарла бла байламлыды. Экинчи кварталда банкла бу жаны бла  политикаларын тюрлендиргенлерини баш сылтауу да андады.