Сакъат сабийлеге, ата-аналагъа - себеплик

Къабарты-Малкъарда саулукъларына чып тюшген сабийлеге Нальчикде бассейннге хакъсыз жюрюрге онг берилгенди. Бу жумушну республиканы Правительствосуну, Сакъат сабийлени битеуроссей организациясыны регионда бёлюмю, Водолечебницаны администрациясы бла бирге къурагъандыла. Бассейн сабийлеге хар ыйых кюн сагъат 10-12 дери бериледи. Ол кезиуню ичинде ала эки къауумгъа юлешинип жюзедиле,  бир кереге отуз адам кирирге боллукъдула.

- Бассейн саулукъгъа бек иги жарагъанын билебиз. Ауругъан сабийлеге уа ол бютюнда бек керекди. Ол себепден ата-анала да, сабийле да, быллай башламчылыкъны къабыл кёрюп, керекли къагъытланы да жарашдырып, бери келип башларларын сакълайбыз, - дегенди сакъат сабийлени  организацияларыны регионда бёлюмюню башчысы  Бёзюланы Марина.

- Сабийлени былай жыйылгъанлары аланы саулукъларын тюзге айландырмасала да, кёллерин кётюрюп, зауукълукъ берликди. Къабарты-Малкъар курорт республикады, алай эсе уа мында саулукъгъа хайыр келтирген, табийгъат берген ахшылыкъла бла хайырланыргъа керекди. Былай ауругъан сабийлеге уа - бютюнда. Шахарда башха бассейнлеге да барып турабыз, алай минерал суула саулукъгъа игирек болгъанына ийнанабыз, - деп белгилегенди ауругъан баланы анасы Джанкишиланы Зули.

Жандауурлукъну акциясыны чегинде Нальчикде орналгъан  медицина лаборатория бассейннге жюрюген сабийлеге саулукъларына къаратыргъа да  себеплик этгенди. «Ата-аналаны барысыны да балаларыны саулукъларын былай тинтдирирге онглары болмагъанын ангылайбыз. Бюгюн жандауурлукъ ишге къатышханыбыз да, алагъа болушургъа сюйгенденди. 50-60 сабийге къарагъанбыз, лаборатория тинтиулени эсеплерин да олсагъатлай ата-аналагъа бергенбиз, алай бла ала балаларыны халларын толусунлай билаллыкъдыла», - дегенди диагностика лабораторияны башчысы Марьяна Кайцукова.

Бассейнде жарым сагъатны ётдюргенлеринден сора, сабийлени аш-азыкъ бла сыйлагъандыла.

Бу акция жылны ахырына дери бардырыллыкъды. Андан сора да аны болжалын кёбейтирге дейдиле. Аны толтурургъа болушлукъну волонтёрла да этедиле. Бу онгла бла жангыз ауругъан сабийле угъай, аланы ата-аналары, абадан сакъатла да хайырланаллыкъдыла. Энчи эс ДЦП-лары эм саулукъларын башха ауур ауруулары болгъан адамлагъа бёлюнеди, бютюнда былай келип кеслерине къаратыргъа файда жаны бла онглары болмагъанлагъа. Багъыу суугъа киргенде эм процедураланы бардыргъанда аланы халларын эсепде тутарча терк медицина болушлукъ этиу службаны директору Алим Шогенов алайда врачла дайым турурча этгенди.