Аллергия аурууладан багъарча жангы амалла

Кёп болмай Нальчикде  Россейде аллергологла бла  иммунологланы  ассоциациясыны жыйырма жыллыгъына атап  илму-практика конференция болгъанды.  Анда баш тема иммунитетлери къарыусуз саусузлагъа   багъыуну жангы  технологияларына жораланнганды.  Форумгъа Москва, Санкт-Петербург, Дондагъы Ростов шахарланы,   Ставрополь крайдан, Ингушетиядан, Чеченден, Шимал Осетиядан эм Къабарты-Малкъардан да   жюзге жууукъ  специалист къатышхандыла.

 КъМР-ни саулукъ сакълау министрини орунбасары Заурбек Батыров, конференциягъа келгенлени  алгъышлай, аны врачла бла алимлени  сынамларын  кючлеу жаны бла энчилигин белгилегенди.  Ишчи программаны чеклеринде  саусузлагъа багъарча амаллагъа  тынгылы къараллыгъын да билдиргенди.  Специалистле, кеслерини жетишимлерин ачыкълагъан сора да,  федерал экспертледен  эсгертиуле алаллыкъдыла эм медицина болушлукъ бериу жаны бла жангы амалланы юсюнден билаллыкъдыла.  Заурбек Султанович Союзну кезиуюнде биринчи аллергология кабинетни  къурагъан, профессоргъа, академикге РФ-ни эм КъМР-ни сыйлы врачына,   аллергология бла  иммунология араны  баш врачына - Хутуйланы Светланагъа  энчи ыразылыгъын да билдиргенди.  

Форум Къабарты-Малкъарда бардырылгъаны бошдан тюйюлдю, бюгюнлюкде регионда ахшы сынамлары болгъан специалистле  урунадыла. Республикада  биринчи аллергология  служба 1970 жылда  къуралгъанды эм СССР-ни кезиуюнде биринчи  аллергология кабинет ишлеп тебирегенди.  Бусагъатда уа  учрежденияда 120 саусуз  жатарча жер барды. Аны структурасы  поликлиника, аллерго-иммунология,  реанимациия эм интенсив терапия, реабилитация бардырыу, уллулагъа эм гитчелеге бакъгъан бёлюмледен къуралады.   Аны бла бирге Элбрусда бёлюмюнде да бир жолгъа отуз адам жатаргъа боллукъдула.   Мында буруннгу жылдан бери коронавирусдан ауругъанла реабилитацияны ётедиле. 

 Аллергология эм  иммунология ара Къабарты-Малкъар къырал университетни медицина  бёлюмюне  киреди. Аны бла бирге федерал даражада   клиника жаны бла тинтиуле бардырыргъа болушады.   Бийик технологияланы кючю бла  «Педиатрия» эм «Дерматовенерология» усталыкълада багъарча  лицензиясы  барды. Мында жарашдырылгъан илму-излем ишле къыралны белгили илму журналларында басмаланадыла эм  конференцияларында  да сюзюледиле.

РФ-ни медико-биология агентствосуну  иммунология институтуну таматасы Наталья Ильина айтханнга кёре, Къабарты-Малкъарны аллергология службасы  бюгюнлюкде  саулай къыралда окъуна  эм даражалыладан бирине саналгъанын  чертгенди. «Биз бери  къонакъгъа келсек,  жангычылыкъланы юсюнден билдиргенибизден сора да, мында жыйылгъан сынамны  да  ишибизде хайырланыргъа итинебиз», - деп къошханды профессор    Наталья Ильина.

Врачла  диагностика эм багъыу жаны бла да докладларын окъугъандыла. Ол санда генно-инженер препаратланы къыйматлыгъы да кёп айтылгъанды.  Аны чеклеринде  астманы, аллергия ринитни, крапивницаны, аллергодерматозну, аллергия бла байламлы башха  аурууланы да жангы амалла бла багъыуну юсюнден темала сюзюлгендиле.

 Жыйылыуда  астма бла  крапивницадан къыйналгъан жерлешлерибизни керек дарман препаратла бла тынгылы  жалчытырча проблемагъа да эс бурулгъанды.  Анга кёре, былтыр республиканы бюджетинден бёлюннген  23 миллион бла 774  минг  сомгъа генно-инженер биология препаратладан (ГИБП) 556 упаковка алыннганды.  Ол санда 7 миллион бла  446 сом багъасына багъалы  ГИБП-ладан  91 упаковка къоллу болгъандыла.  Аны юсюнден толуракъ Хутуйланы Светлана докладында хапарлагъанды.

Форумда Россейни Аллергологларыны ассоциациясыны профессорлары бла доцентлери иммунология бла байламлы лекцияларын окъугъандыла.  Специалистле уа бирден   аллергология бла иммунологияны тамблагъы кюню  молекуляр-таргет терапия бла байламлы болгъанын белгилегендиле.  Жангы дарманла бла жалчытыу да танг кесек саусузгъа себеплик этериги сагъынылгъанды.

Магометланы Сулейман.
Поделиться: