Санла бла бирге мыйыны да кючлерча

Кёп болмай Къабарты-Малкъар къырал университетни жаш алимлери «акъыллы» тренажёр къурагъандыла. Ол жарау этген адамны санларына уллу  ауурлукъ жетмезча эм  бир затын  ачытмазча да   кёз-къулакъ болады.    

 Сагъынылгъан комплексни тохтаусуз къанны басымын, адам ненча солугъанын эм къан къаллай бир кислород бла жалчытылыннганын да  тинтирча  датчиклери барды. Алай бла адам арыса неда бир затны тюз этмей башласа, жалгъан интеллект  автомат халда аз ауурлукъ берилирча этеди. Быллай амалны  себеплиги бла жарау этгенни санлары аурумайдыла эм аберисин  да ачытмайды.

Аппаратны баш энчилиги  спорт бла  бирге психология жаны бла болушлукъ тапдырыргъады.  КъМКъУ-ну математика бла тюз илмуланы институтуну тамата преподаватели Марита Хацукова айтханнга кёре, жараула  энчи кёзлюкле бла виртуал халда бардырыладыла. Сёз ючюн,  велотренажёрда олтургъан   кесин бир тюрлю  жолда баргъан сунады. Анга кёре, тёш жерде педальланы бурургъа къыйын болады, башха чырмауладан да ётерча   иги ойларгъа  тюшеди.

Кёбюсюнде сабийле жыл санларына келишмеген жараула бла кюрешедиле. Аны себепли арып-талып экинчи  анга тартынмай къаладыла.    «Акъыллы» устройство  уа алгъадан сабийни онгун эсге алады эм жетишимле болдурурча энчи халда   программа къурайды.  

Бюгюнлюкде устройствону ишлетген программа къырал регистрацияны ётгенди. Энди ишчи къауум аппарат жалгъан акъылны тынгылы хайырланырча эм упражненияланы да тюз толтурурча амалланы сингдирип бошай турадыла.

Келир заманда  жаш алимле  тренажерлада генетика, физиология эм нейропсихика дегенча бёлюмле да хайырланырча модельле къурар муратлары болгъанын да ачыкълагъандыла.