Мирзеуле тургъан ындырлагъа заран тюшюредиле

Россей Федерацияны  Сауутланнган кючлери мирзеу тургъан жерлеге бомбаланы атадыла, аны бла Украинада болгъан мирзеу  бла болум къыйыннга айланырыкъды эм Европада ачлыкъ кирирге боллукъду деп, ётюрюк хапарны юсюнден сурат бла билдириу Getty Images деген информация агентствода барды. Аны юсюнден войнасфейками.рф телеграм-канал билдиреди.

Суратны тюбюнде «мирзеу тургъан ангар» деп жазылып турады, алай анда аскер сауутла сакъланнган ящикле болгъанлары ачыкъ кёрюнеди. Ол себепден, ангар аскер объектге саналгъаны белгили болуп турады, ма аны ючюн россейли аскерчилени аны атдырыргъа закон бла эркинликлери барды.

Бу жалгъан хапар (фейк) асламысында Западда жашагъанлагъа деп жайылады. Шёндю Украинаны эл мюлк продукциясын тышына чыгъарыу бла    къыйын болгъан кезиуде, ол санда мирзеуню да, аллай ётюрюк хапарла халкъ асламланы сейирлерин бютюн да бек къозгъайдыла.

Аллай билдириуле Западда жашагъанланы къоркъутур мурат бла этиледиле эм жайыладыла.  Эсигизде эсе, мындан алгъа Владимир Зеленский Латвияны парламентине, Россей къуруда Украина бла тохтап къаллыкъ тюйюлдю, деп магъанасыз хапарны айтхан эди.