Къыйынына – бийик багъа

Къабарты-Малкъарны Курортла эм туризм министерствосунда Орус география обществону «ЮНЭК» жаш тёлю клубуну келечилерине къууанчлы халда «Россейни туристи» деген белгилени бла шагъатлыкъ къагъытланы бергендиле.  

«ЮНЭК» клуб юч жылдан асламны ишлейди, «Жашлыкъ. Илму. Экология. Маданият» дегенча ангылатылынады. Аны башчысы Аскер Конгапшев билдиргенича, ала ишлерин эки жаны бла бардырадыла: естественный илмула эм художестволу-спорт. Ол жаш адамланы хар не жаны бла айнытырча дисциплинала аралы байламлыкъланы къураргъа себеплик этеди. «Бизни ишибизде эм магъаналы сабийлени бирликге юйретиудю, Ата журтларыны тамблагъы кюню ючюн жууаплылыкъны сездириудю. Хар келечибиз республикабызны тамашалыкъ табийгъатын сакълаугъа къошумчулугъун этеди», - дейди клубну эксперти Гузиланы Хусейн. 

Жыйылгъанланы туризм эм курортла министр Мурат Шогенцуков алгъышлагъанды. Ол сабий туризмни жангыртыу бла клубну башчылары эрттегили ахшы сынамны къайтаргъанларын чертгенди. «Аны болушлугъу бла адамланы араларында шуёхлукъ кючленнгенди, жамауат ачыгъыракъ болгъанды. Кесими сабийлигими, жаш заманымы эм иги эсгериулерим туризм бла байламлыдыла. Бюгюн он жылны ичинде турист белгиле биринчи кере бериледиле, аны ючюн бу жумушну магъанасы бек уллуду. Ол сиз туугъан жеригизни интернетни юсю бла угъай, кесигиз барып, кёрюп таныгъаныгъызны шартыды. Сиз бусагъатда тюз жолдасыз, гитче туугъан жеригизге сюймекликни юсю бла, табийгъатха къатылмай а ол сезим келмейди, уллу Ата журтугъузну да сюериксиз», - дегенди ол.    

Альпинизм, къаялагъа ёрлеу эм спорт туризмден федерацияны вице-президенти Гумаланы Борис сабий туризмни системасы тюрленнгенин эсгертгенди. «Бусагъатда разрядланы алыугъа жангы излемле салыннгандыла, эм игиси уа, бу иш жангы кюч бла тамамланып башланнганыды. Шёндю «Россейни туристи» белги чырмаулары бла жолоучулукъну ётгенлеге берилген биринчи шагъатлыкъ документди. Клубха къатышханла хар нени да кеслерини кёзлери бла кёредиле, къоллары бла тиедиле – ол жер, къудурет бла биринчи байламлыкъды. Бизни муратыбыз сабийле тёгерекдеги дунияны къаршы байламлыкъда танырча этергеди», - деп къошханды. 

Клуб окъууну кезиуюнде къайда болгъаныны, не бла кюрешгенини юсюнден Гузиланы Хусейн фильм кёргюзтюп билдиргенди. Алай бла сабийле талай жолоучулукъгъа чыкъгъандыла, ол санда Чирик кёллеге, Нартия таугъа, Жетмиш суугъа, Хазны чыраннга. Уллу Хорламны 77-жыллыгъына атап, Тоторс таугъа ёрлегендиле. Клуб илмуда уллу жетишимле болдургъан тиширыуалимлени юслеринден конференцияны къурагъанды. 

Юч кюнню ичинде окъуучула заповедникни ишчилери эм педагогла бла бирге Бызынгы участкада экология жолчукъланы тапландырыу, айбатландырыу, тазалау бла кюрешгендиле. Волонтёр программаны чегинде аланы профессонал суратлагъа бла видеогъа алдыргъандыла, «Экология дозор» квест да сейир ётгенди. Волонтёрла билдириу къангаланы орнатыргъа болушхандыла, экскурсиялагъа да чыкъгъандыла. Андан тышында, эки экология маршрут жарашдырылгъанды. 

Бу жол белгилени Нальчикден бла Ташлы-Таладан сабийле алгъандыла, алагъа Алтууланы Арсен, Байсыланы Тембулат бла Сальма, Гузиланы Жаннета, Таукенланы Аслан, Сараккуланы Зульфия бла Карина, Сабина Бетрозова, Къулийланы Танзиля эм башхала тийишли болгъандыла. Къабарты-Малкъарда сабий туризмни айнытыугъа эм ёсе келген тёлюню юйретиуге салгъан къыйынлары ючюн Курортла эм туризм министерствону грамоталары бла Аскер Конгапшев бла Гузиланы Хусейн саугъаланнгандыла. Экологну кюнюне атап, респубикада аз тюбеген битимлени сакълау акцияны бардыргъанлары ючюн ведомствону ыразылыкъ къагъытлары бла Ташлы-Таланы бла Огъары Лескенни мектебини директоруну орунбасары Цаколаны Муса бла информатикадан бла географиядан устазы Гузиланы Илияс белгиленнгендиле. 

Жангы окъуу жылда клуб географиясын кенгертир, анга Чегем эм Сукан ауузланы къошар, клубха республиканы башха районларындан да жаш адамланы къатышдырыр, сабийлени араларында тири туризмни айнытыр муратлыды.