Адамны бла жерни юсюнден сагъышландыргъан тюбешиу

Бу кюнледе  Къабарты-Малкъар къырал аграр университетни  агрономия факультетинде  «Жер эм адам» деген интерактив тюбешиу болгъанды. Аны   КъМР-ни  Жамауат палатасында Жаш тёлю советни агропромышленный комплексни айнытыу жаны бла комиссиясы къурагъанды. Анда сёз  адам табийгъатха къаллай заран салгъаныны юсюнден баргъанды.

Сюзюуге  КъМР-ни Парламентинде  Жаш тёлю палатаны,  Жаш тёлю правительствону,  КъМР-ни АПК-сында ишлегенлени профсоюзуну келечилери, вузну илму-излем иш жаны бла  проректору Анзор Езаов, башха преподавательлери бла студентлери  къатышхандыла. Жыйылыуну къураугъа  КъМКъАУ-ну студенти Ахмед Саболиров бла   агрономия факультетни  аспиранты  Эльдар Шантуков да уллу къыйын   салгъанларын да белгилерчады.

Тюбешиуню кезиуюнде   Ян-Артюс Бертранны «Дом» деген документли фильмини биринчи кесеги да кёргюзтюлгенди.  Тюрлю-тюрлю регионлада экологияны юсюнден хапарлагъан киногъа къарагъандан сора, жашла бла къызла  адам улу жер жюзюне салгъан хатаны эмда табийгъатны къоруулауну юсюнден оюмларын айтхандыла.