Электрон тюкенле алыучулагъа онг бередиле

 Шёндюгю къыйын кезиуде Яндекс.Маркет, Ozon эм Wildberries электрон тюкенле алыучулагъа бла сатыучулагъа онгла берирге оноулашхандыла. ФАС-дан билдиргенлерине кёре, Яндекс.Маркет сатыучугъа ахчасын заказ этилген кюн окъуна кёчюрлюкдю, аны ючюн комиссияны уа бир процентге дери тюшюргенди. Алыучу экили бола кетип, артда угъай деп къоймазча, бир-бир товарланы багъасын аллындан окъуна аллыкъдыла. Ишни алай жетинчи мартха дери бардырыргъа дегендиле, алай, болум тюрленмесе, аны болжалы андан да ары созулургъа боллукъду.

Ozon заказла ючюн ахчаны сатыучулагъа алгъын айгъа бир кере кёчюрюп тургъанды. Шёндю уа, февральны экинчи жарымында этилген заказланы ахчасын 5, 9 эм 15 мартда берликди. Дагъыда биринчи мартдан башлап, 30 июньнга дери товарланы бир талай тюрлюлерин тюкеннге салгъан ючюн ахча аллыкъ тюйюлдю. Сёз ючюн быланы: электроника (аксессуарла ары кирмейдиле), бахчалада, сабийлеге жай кезиуде, адам кесине къарагъанда эмда саулугъуна изленнген эмда таматалагъа спорт товарла, сабий коляскала эмда транспорт, киштиклеге бла итлеге витаминле эм ашла. Март айны ортанчыларына дери болум тюрленмесе, бу онгланы болжалын андан ары созарыкъдыла.

Wildberries тюкен товарланы багъаларын ачыкъ басмаларыкъды. Шёндю неллай бир тургъанларын угъай, ары дери да талай айны ичинде ол ненча болгъанын билдирликди. Аны себепли адамла сатыучула неллай бир къошханларын кёрлюкдюле, сюйген затларын,  андан угъай, башхадан алыргъа боллукъдула.