Къабарты-Малкъарда уллу контакт ара ачылгъанды

Къабарты-Малкъарны Башчысы Казбек Коков  коронавирус бла байламлы контакт арада болгъанды, аны республиканы оноучусуну буюруу бла къурагъандыла эм ол бу кюнледе ишлеп тебирегенди.

Араны баш борчу, коронавирус инфекцияны жангы тюрлюсю къыстау жайыла баргъанда, республикада жашагъанла бла байламлымлыкъны къыйматлы эм терк жалчытыуду.  Кёп каналы болгъан телефон ызла битеу поликлиникала эм больницала бла байламлыдыла, аланы мурдорларында бек къоркъуулу инфекция аурууланы бакъгъан госпитальла ишлейдиле.  Бюгюнлюкде контакт арада  20 оператор телефоннга келген билдириулеге жууапла берип турадыла. Ол ишни Къабарты-Малкъар къырал университетни медицина факультетини ординаторлары бла тамата курсларыны студентлери бардырадыла. Дагъыда алайда КъМР-ни Саулукъ сакълау министерствосуну консультация эм диагностика арасыны врачлары болушлукъ керек болгъанлагъа телефон эм видео амал бла консультацияла бередиле.

 «Озгъан ыйыкъны ичинде контакт арагъа телефон бла сёлешгенлени саны 4 кереге кёбейгенди» - дейди КъМР-ни цифралы айнытыу министри Ислам Ашхотов.

Андан сора шёндю алгъын медицина учрежденияланы мурдораларында къуралып тургъан башда сагъынылгъанча аралада 75 оператор ишлейди.

 КъМР-ни саулукъ сакълау министри Рустам Калибатов ангылатханына кёре, адам, къайда жашагъанына да къарамай, телефон бла «112» номерге сёлеширге боллукъду. Алгъан билдириуге кёре, операторла терк болушлукъ берген медицина къауумну чакъырыргъа керекмиди, амбулатория бригада юйлерине барыргъамы, не да видео амал бла консультация этилсеми тийишлиди деген оноуланы чыгъарадыла.  Женгил халда коронавирусдан ауругъанланы саны терк ёсе баргъанына кёре, сагъынылгъан амалланы сингдириу, саулукъ сакълау учрежденияланы онгларын къыйматлы хайырланыргъа  онг берликди.

 КъМР-ни Башчысыны буюрууна кёре, Къабарты- Малкъарда тестлени бардырыу эки кереге кёбейгенди, кюн сайын алты мингден аслам адам тест береди.

 «Ол амалланы хайырындан ауругъанланы санын ачыкълайбыз,  аланы ичинде  симптомлары болмагъанланы, не да женгил халда ауругъанла белгили боладыла.  Шёндю он минге жууукъ адам багъыуну амбулатория амал бла алады, аладан сегиз мингде ауруу болгъаны тохташдырылгъанды.    Госпиатальлада болушлукъну 600 саусуз аладыла, аладан 150 сабийледиле», - дегенди министр.

Казбек Коков экспресс-тестлени сатып алыуну контрольда тутуну юсюнден буюруу бергенди, андан сора да республикада жашагъанладан контакт арагъа сорууланы мычымай  тамамларгъа  кереклисин чертгенди, деп билдиредиле республиканы оноучусуну пресс-службасындан.