Урунуу рынокда сурам болгъан усталыкъла

Кёп болмай, Эски Черекде Къабарты-Малкъарны   агропромышленный колледжинде - «Эл мюлк машиналаны ишлетиу»,  «Сити-фермерство», «Промышленный терек бахчалыкъ», «Агрономия» компетенцияладан тёрт мастерской ачылгъанды. Анга  КъМР-ни жарыкъландырыу, илму эмда жаш тёлюню ишлери жаны бла министри Анзор Езаов эм Урван муниципал районну администрациясыны башчысы Валерий Аджиев эм башхала къатышхандыла.

Мастерскойла «Жаш профессионалла» федерал эм «Билим бериу» миллет проектлени чеклеринде  профессионал билим берген организацияланы арасында бардырылгъан конкурсда колледж кесин айырмалы кёргюзтгени ючюн  ачылгъандыла.

Анзор Езаов  юч жылны ичинде  республикада энтта да 40 мастерской ачыллыгъын, аны бла бирге сагъынылгъан кезиуге колледжле мюлк-техника мурдорларын игилендирирге онг табарыкъларын да билдиргенди.  Ол шарт специалистлени бюгюннгю стандартлагъа кёре хазырларгъа, сынамларын ёсдюрюрге да  онг тапдырлыкъды. Аны бла бирге, орта профессионал билим берген учрежденияланы даражалары да  ёсерикди. 

Эсге сала айтсакъ, былтыр орта  профессионал билим берген организацияланы арасында баргъан  «Жаш профессионалла» конкурсда хорлагъаны ючюн, Къабарты-Малкъарны  агропромышленный колледжинде  бульдозерни, автогрейдерни,  экскаваторну,  погрузчикни эм ауур жюк ташыгъан машинаны жюрютген водитель усталыкъладан  мастерскойла да  ачылгъандыла.