Таулу къызны илму ишине – бийик багъа

Сабанчыланы Рашитни къызы Фарида А.А.Ежевский атлы саугъагъа  тийишли болгъанды. Къабарты-Малкъар къырал аграр университетни 3-чю курсунда окъугъан къызгъа эл мюлк техниканы дизель двигательлери бузулмай кёп заманны ишлерча амал тапханы ючюн берилгенди бу миллет саугъа. Аны илму башчысы уа техника илмуланы кандидаты, «Машиналагъа къарауну эмда ремонт этиуню технологиясы» кафедраны тамата преподаватели  Анзор Болотоковду.

Эсигизге салайыкъ, А.А.Ежевский атлы Миллет саугъаны«Росспецмаш» ассоциация Россейни Промышленность эм сатыу-алыу министерствосуну себеплиги бла тохташдыргъанды. Аны мураты – ата журтлу машинала ишлеу жаны бла илмуну айнытыуду, фахмулу студентлеге тутхучлулукъ этиудю, аланы усталыкъларын ёсдюрюрге болушууду, бийик окъуу юйлени бла заводланы араларында байламлыкъланы къурауду.

  Бу даражалы саугъа ючюн бардырылгъан конкурсха вузланы асламысында эл мюлкге машинала жарашдырыу бла байламлы болгъан факультетлерини 2-5-чи курсларыны, бакалавриатны 2-4-чю курсларыны студентлери къатышадыла. Аланы илму ишлерине  уа эл мюлк техника чыгъаргъан уллу заводланы, Россейни Промышленность эмда сатыу-алыу министерствосуну, «Росспецмаш» ассоциацияны башчылары, экспертле да къарап багъа бередиле.

  Бу жол конкурсха къыралны алтмыш бийик окъуу юйюнден студентле къатышхандыла. Аладан жетиси, ол санда Къабарты-Малкъарны аграр вузуну келечиси да, хорлагъандыла.

  Лауреатланы  Самарада,премияны стратегиялы партнёру болгъан «Евротехника» компанияны тийресинде, къууанчлы халда саугъалагъандыла.