Ачыкъ, хайырлы, сейир проектле

Бу кюнледе Х.М.Бербеков атлы Къабарты-Малкъар къырал университетде НТИ-ни платформасыны «Осенний навигатор» онлайн-сессиясы ётгенди. Анга вузланы «Точка кипенияларыны» битеу бёлюмлери къатышхандыла, ол а  Россейни 48 шахарындан 70 къауум.

Къыралны 41 вузунда «Точка кипенияны» экинчи уруму бир заманда ачылгъанды. Аны себепли  КъМКъУ-да цифралы тюрлениулени жангы бёлюмю башланнганды – НТИ-ни толтурууну чеклеринде билим бериу «Цифровой прорыв» аты бла интенсив. Аны юсюнден вузну ректору Юрий Альтудов билдиргенди.

-Стратегиялы башламчылыкъланы  агентствосуна ыразылыгъыбызны билдирирге сюеме. Алай  бла бизни университетде «Точка кипения» къыралны вузларыны биринчи къаууму бла ачылгъанды. Биз аны ачыкъ, хайырлы этерге кюрешгенбиз. Мында окъуучула, преподавательле, алимле, бизнесни эм къырал властны келечилери бирге проектлени жарашдырыу бла дайым уруннганлай турурча онг чыкъгъанды. Эинчи билим бериу интенсив кесини ишин башлайды. Биз андан ахшы кёрюмдюле сакълайбыз, - дегенди ол.

КъМКъУ-ну «Точка кипениясында» эм цифралы LEADER ID платформада он мингинчи болуп регистрацияны ётген информация технологияла бла экономика колледжни студенткасы Надежда Степанова болгъанды. Университетни ректору анга эсде къаллыкъ саугъала бергенди эмда вузну цифралы тюрлениуле бла уруннган коллективине ахшы къошумчулукъ этеригин тежегенди.

АНО университет 20.35-ни партнёрлары бла байламлыкъ жюрютген биригиуню башчысы Мисирланы Асият Миллет технология башламчылыкъланы экосистемасына жораланнган лекция окъугъанды, НТИ-ни матрицасы бла шагъырейлендиргенди эмда декабрьни ал кюнлеринде Сочиде бардырыллыкъ «Зимний остров» къыш интенсивни юсюнден айтханды. Дагъыда КъМКъУ-ну  Окъуучуларын бла анда уруннганланы Стратегиялы башламчылыкъланы агентствосуну келечилери болургъа чакъыргъанды.

Лекция РФ-ни Президентини цифралы эм технологияла айныу жаны бла энчи келечисини Дмитрий Песковну видео-алгъышлауу бла бошалгъанды. Андан сора да, «Цифровой прорыв» билим бериу интенсивге къатышырыкъ студентле бла биринчи тюбешиу  болгъанды.

-Жаз башында бизде биринчи «Цифралы бийиклик» аты бла билим бериу интенсив бардырылгъанды, анга юч жюзден артыкъ студент къатышханды эмда сегиз проект жарашдырылгъанды. Аладан бири – «Интерактив дисплейлери бла кийимле тигиу». Бу проект алчыланы санындады.

Миллет технология башламчылыкъла – эм уллу экосистемады, ол битеу къыралны социал-экономика айныуну инновация структурасын жангыртады, аны себепли  вузланы таматалары да анга болушлукъ этедиле, биз да тири къатышыргъа кюрешебиз, - дегенди НТИ-ни проектлерин бардырыу департаментни башчысы Махийланы Танзиля.

ТОКУМАЛАНЫ Салим.
Поделиться: