Жангылыкъла

Келир жылда Элбрусда  отуз экология  жолчукъ  игилендирилликди. Аллай амал курорт жылны узуну толу кючю бла  ишлерча ахшы къошумчулукъ этерикди.  

Шимал-Кавказстатны эсеплерине кёре, быйыл Къабарты-Малкъарда эл мюлк производительлени барысы да  мирзеу бла къудору битимледен 1052 минг тонна тирлик жыйгъандыла.   Орта эсеп бла алып айтханда, бир гектардан 59,5  центнер чыкъгъанды. Былтыр бу заман бла тенглешдиргенде ол 5,3 процентге кёпдю.

Кадастр палата келир жыл «Роскадастр» праволу компаниягъа кирликди. Бу оноу неге келтирлигини, ол компания не зат бла кюреширигини юсюнден КъМР-ни Экономиканы айнытыу министерствода айтхандыла.

Быйыл 13-15 декабрьде Бирлешген Арап Эмиратлада (ОАЭ) Дубай шахарда «Middle East Organic And Natural Product Expo 2022» кёрмюч ётгенди. Ары келгенле органика эмда таза, жалгъан болмагъан ашарыкъланы тюрлюлерине къарагъандыла. Жууукъдагъы Востокда быллай продукцияны кёрмючю жаланда ма буду. Ол бардырылып башланнганлы онжети жыл болады, деп билдиргендиле КъМР-ни Экономиканы айнытыу министерствосундан.

Быйыл 24 декябрьде  «Эльбрус» тау-лыжа курортда къыш кезиуню  ачылыуу бла байламлы уллу байрам ётерикди. Къонакълагъа курортну белгили  жигити   Муха тюберикди.  Андан сора да, ол кюн шоу, концерт, тюрлю-тюрлю конкурсла бла оюнла да ётерикдиле.  

8-17-жыллыкъ сабийлери болгъан юйюрлеге ай сайын берилиучю ахча – файдалары жашау этерге керекли ахчаны эм аз ёлчемине жетмеген ата-аналагъа къыралны жанындан болушлукъну тюрлюсюдю. РФ-ни Президенти аны юсюнден буйрукъну къабыл кёргенли бу ахчаны Къабарты-Малкъарда 51 303 юйюр аладыла, деп билдиредиле Пенсия фондну регионда бёлюмюню пресс-службасындан. 

Шимал-Кавказ статистика управленияны эсеплерине кёре, быйыл  Къабарты-Малкъарны  мюлклерини барында да малланы бла юй къанатлыланы этинден  91,7 минг тонна сатылгъанды. Сютню юсюнден айтханда,  494,6 минг тонна сауулгъанды эм  жумуртхаладан да 192,5 миллиону алыннганды.

РФ-ни МЧС-ини КъМР-де Баш управлениясыны энчи къаууму «Къан бер да - жашауну сакъла!» деген акцияны къурап, анга тири къатышхандыла.

КъМР-де Росгвардияны управлениясында Жангы жылгъа аталгъан байрамланы кезиуюнде низамны сакълау жаны бла оператив штабны жыйылыуу ётгенди.

Россейни Пенсия фонду ишин бардырыуда баш борчларындан бирин инсанлагъа жумушларын толтурууну тынчыракъ этиуде кёреди, ол санда информация-ангылатыу материалла бла жалчытыуда да.