Жолда къоркъуусузлукъну жалчытырча

Къабарты-Малкъарда «Къоркъуусуз республика» учреждение жамауатны ырахатлыгъын жалчытыр муратда шахар тийреде, жоллада эм башха жерледе да видеокамераланы санын кёбейтеди,  деп билдириледи КъМР-ни Транспорт эмда жол мюлк министерствосуну пресс-службасындан.

Бюгюнлюкде  «Къоркъуусуз республика» учрежденияны  443 жерде 1251 камерасы ишлейди. Ол санда адамла аслам жюрюген жерледе – 446, транспорт инфраструктурада -131,  социал магъаналы объектледе – 48, жоллада  – 202, билим бериу учреждениялада –210 эм административ мекямлада- 71 эм коммунал службалада 2 барды. Алай бла 208 камера автомат халда жолда жорукъланы бузгъанланы сурата тюшюредиле. 

«Къоркъуусуз республика» учрежденияны баш борчларындан бири - республиканы адамларын эм къонакъларын да тюрлю-тюрлю хаталадан сакъларгъады. Ол тынгылы тамамланыр ючюн а ич ишлени органлары бла да байламлыкъ жюрютюледи. Ол санда тюрлю-тюрлю жерледе 18   «Гражданин-полиция» деген терк болушлукъ тапдыргъан  пультла   ишлейдиле.

Алай бла ГИБДД-ны республикада бёлюмюнден билдиргенлерича, быйыл алты айгъа камераланы хайыры бла 613 771 административ бузукълукъ этилгени тинтилгенди. Ол былтыр бу замандан 194912 шартха кёпдю. 

Камераланы хайыры бла автомобиль жолланы къыйын эм къоркъуулу  участокларында аварияланы, ол санда ачыгъанланы эм ёлгенлени да  санын азайтыргъа онг табылгъанды.