Жетишимли ишлеуню баш борчха салып

Былтыр   «Севкаврентген-Д» завод миллет проектге тюшгенди.  Аны чеклеринде жарым жылны ичинде предприятие «аяулу производство» амал бла  ишлейди. 

Программаны баш борчу гитче эм уллу предприятиялада производствону ёсдюрюргеди.  Аллай амал, товарланы санын кёбейтирге себеплик этгенинден  тышында, качествосун да  кётюреди.  Эм башы уа, ишни къысха заманны ичинде тамамларгъа онг  береди. 

  Бусагъатда хайырланылгъан жангы кёп функциялы  станоклада   тюрлю-тюрлю затла жарашдырыргъа жарайды. Аны ючюн жаланда керек ишге  тюрлендирирге керекди.  Алгъын быллай жумушну тамамларча  40 минут къоратыргъа тюшген эсе, энди аны сегиз минутха тамамларгъа жарайды. 

- Производствону  кезиуюнде операторла, ишчиле эм бёлюмню таматалары да кеслерини борчларын бютюн иги  толтурурча онгланы табаргъа кюрешедиле.  «Сёз ючюн, жыйыучу цехде,  технологиядан тышында, ишге къарамны да тюрлендиргендиле»- дейди техника бёлюмню таматасы   Батырбек Калоев. 

Цехде медицина приборлагъа жараулу   абериле хазырлайдыла.  Эртте мында уруннганланы кёбюсю «конвейер» халда ишлегендиле,  керексиз  жумушлагъа заманларын къоратхандыла. Бусагъатда уа оператор жеринден тепмей ишин эте береди.     Жангы методика штатны кёбейтирге эм жангы кадрланы да къысха заманда  юйретирге болушурукъду.

Проект ишлегенли  юч жыл болады. Биринчи алты айда аялу производствода жангыдан  ишлерге юйретирге тюшеди.  Ызы бла кураторла болумну тинтип, кемчиликлеге эс бурадыла. Аланы къысха заманда тамамларча, коллектив бла къыйматлы амалла излейдиле. Алай бла производствону 30 процентге игилендирирге онг табылады.   

Проектге жарашдырыу, эл мюлк, транспорт, къурулуш, сатыу-алыу предприятияла   къатышыргъа боллукъдула.  Къабарты-Малкъардан анга дагъыда юч биригиу къошулгъанды. Аланы мурдорларында «Лидеры производительности» программа бла ишчиле билимлерин ёсдюрюрге онг табарыкъдыла. Сынауланы ётген биригиулеге  къыралдан болушлукъ да  тапдырыллыкъды. 

Анга къаллай излемле этилгенлерини эм заявканы къалай  берирге кереклисини  юсюнден   Производительность. РФ сайтда толуракъ  билирге боллукъду.