Владимир Путин Пятигорскда Миллетле аралы халла жаны бла советни жыйылыуун бардыргъанды

Кенгешге КъМР-ни Башчысы Казбек Коков да къатышханды. Аны юсюнден республиканы оноучусу социал сетьде кесини энчи бёлюмюнде билдиргенди. 

  «Магъаналы да, тынгылы да ушакъ бардырылгъанды, - деп жазгъанды Казбек Коков. – Аны кезиуюнде алимле, Россейни жангы тийрелерини келечилери, энчи аскер операциягъа къатышханла, жамауат биригиуледен келгенле да кеслерини оюмларын ачыкъ айтхандыла. 

  Владимир Владимирович миллетле аралы халлада баш магъаналы борчланы туура этгенди. Андан сора миллет политиканы шёндюгю россейли амаллары сюзюлгендиле, жангы регионланы къыралыбызны социал эмда маданият дуниясына къошууну юсюнден сёлешиннгенди эмда тышындан къоркъуу тюшген заманда къырал миллет политиканы стратегиясын тюрлендирирге кереклисини юсюнден айтылгъанды.

 Жыйылыуда сёлешгенлени барысыны да баш оюмлары бу болгъанды: кёп миллетли Россейде бурун заманладан келген бирликни сакъларгъа  эмда аны халкъларыны бир ниетлиликлерин бюгюнлюкде, энчи аскер операция баргъанда, запад къыралланы жанындан уллу къоркъуу чыкъгъан заманда, бютюн кючлендирирге.  Кёп миллетлилик  - «ол бизни кючюбюздю, нени да хорларыкъ бек уллу кюч». Аскер къарындашлыкъ къыралыбызны кёп миллетлерини келечилеринден къуралады. Биз жигитлерибиз бла ёхтемленебиз, алагъа тутхучлулукъ этебиз. Хар бирибиз да Ата журтубузну айырылмазлыкъ кесеги болгъанын, Россей эмда аны келир заманы ючюн жууаплылыкъны да  сезебиз.

 Къыралда тиллени, адет-тёрелени да кёп тюрлюлюклери Россей Федерацияны Конституциясы бла къорууланады. Биз барыбыз да багъалы кёрген хазналаны мурдорун да ма ала тутадыла. Къабарты-Малкъар Республикада да хал ма алайды. Мында кёп миллетлени келечилери бирликде, шуёхлукъда бла келишиулюкде жашайдыла, ана тиллерин, маданиятларын, юйюр эмда миллет адет-тёрелерин сакълайдыла, Ата журтубуз жашнар, келир тёлюле да тынч-ырахат жашар ючюн бет жарыкълы урунадыла».