От тюшюуге дайым сакъ болургъа керекди

Къабарты-Малкъарны от ёчюлтюучю-къутхарыучу къауумлары былтыр аллай шартла болгъан жерлеге 1750 кере чыгъып мадар этгендиле. Жарсыугъа, от тюшгенини хатасындан онбеш тамата инсан эмда беш сабий ауушхандыла, 54 адам а жаралы болгъандыла. Аны юсюнден республиканы от тюшюуге къажау службасыны («КБ ПСС») пресс-арасындан билдиргендиле.

Ёртенледе адам ёлмезча эмда от тюшюу жаны бла болум осалына кетмезча, адамлагъа тийишли жорукъланы ангылатыр хыйсап бла быйыл мартда «От тюшюу жаны бла къоркъуусузлукъну айы» деген жумуш тамамланнганды. Аны чеклеринде, граждан къоруулауну Битеудуния кюнюне жораланып, сабий чыгъармачылыкъны конкурсу да бардырылгъан эди. Анга алты жюзден артыкъ окъуучу къатышханды.

Дагъыда от тюшюу жаны бла къоркъуулу болум эсленнген онбир элде, служба, сабийле да къошулуп, спорт эришиуле, тематика конкурсла, кёрмючле бардыргъанды. Жууаплы инсанла эмда педагогла уа юйретиулеге эмда инструктажлагъа къатышхандыла. Бу жумушланы хайырын битеуда 13755 адам кёргенди.

 Андан сора да, «КБ ПСС» учрежденияны специалистлери, МЧС-ни Къабарты-Малкъарда Управлениясыны надзор эмда профилактика ишле бёлюмюню, эллени администрацияларыны келечилери да къошулуп, къолайсыз эмда кёп сабийли юйюрлеге, сора дагъыда абаданлагъа эмда сакъатлагъа тийишли жорукъланы ангылатхандыла, газ эмда электрокюч печлени къалай хайырланыргъа жарагъанын билдиргендиле, къургъакъ кырдыкны, къауданны кюйдюрюрге жарамагъанын да туура этгендиле. Анга битеуда 87 юйюр къатышханды.

Ишден бош заманларында службаны келечилери жыйырмадан артыкъ элде адамланы от тюшюу жаны бла къоркъуусузлукъну жорукъларына юйретгендиле. Алай бла ала 3650 юйде болгъандыла, 7229 инсанны ол излемле бла шагъырейлендиргендиле.

«От тюшюу жаны бла къоркъуусузлукъну айыны» эсеплерин чыгъара, службаны башчысы Анзор Карданов ала бардыргъан бу ишни хайыры иги болуруна ышаннганын билдиргенди. Ёртенлени саны, ала салгъан хата да азайыр, адамла уа эслирек болуп башларла, дегенди ол.