«Жюрегиме жетген макъамны эшитсем, анга тепсеу да къураялама»

Адамла бурун заманладан бери да тепсеуню юсю бла сезимлерин, сюймекликлерин, ич дунияларын билдирирге кюрешгендиле. Бизни миллетде да тепсеулеге уллу магъана берилгенди. Аласыз бир той, къурманлыкъ да ётмегенди. Ариу тизилип тепсеген жашла бла къызла чырайлыкълары, субайлыкълары, ариулукълары бла да кёз байлагъандыла,  къартла уа алагъа ыразылыкъларын къарслары бла билдиргендиле. 

Шёндю  сабийледен башлап абаданлагъа дери тепсерге юйренирге амалла кёпдюле. Юйретиучюле уа, асламында, къырал ансамбльледе тепсеген сыйлы артистледиле. Жаболаны  Анжела  аладан бириди. 

Ол тепсеу жолун гитчеликден башлагъанды, Къабарты-Малкъарны сыйлы артистлерини сохтасы болуп тургъанды.  Аны фахмулулугъун кёрюп, «Балкария» ансамбльге  чакъыргъандыла.  Анда бизни айтхылыкъ  Улбашланы Мутайны башчылыгъында ишлеп тургъанды. «Ансамбльде онюч жылгъа жууукъ заманны тепсегенме. Ол жылланы ичинде Россейни эм тыш къыралланы даражалы сахналарында кёргюзтгенбиз усталыгъыбызны. Къайры барсакъ да, къараучула бизге жарыкъ тюбегендиле,  къызыу къарсла бла ыразылыкъларын билдиргендиле»,– деп эсгереди Анжела.

Ол биргесине ишлегенлеге да махтау салады. «Бир бирге не заманда да болушлукъ эм себеплик этгенлей тургъанбыз. Концертле бла жангы жерлеге терк-терк барыуубуз, чыгъармачылыкъ хал мени къаныма асыры терен сингнгенден, жашаууму ансыз кёралмай эдим. Ол кезиуде тепсеу мени къадарым болгъанына тюшюннгенме», – дейди Жаболаны къызы. 

1990 жыллада ол жаланда бизни республиканы эм Шимал Осетия-Аланияны тепсеулери бла шагъырей эди. Артда Кавказны бла Закавказьени  битеу миллетлерини  тепсеулерине юйренип башлагъанды, аны бла да къалмай, татар, чуваш, къазакъ эм шотландиялы тепсеулеге да уста болгъанды. 

– Бирле алгъа тепсеу, ызы бла уа анга макъам жаратылады, дейдиле. Мени оюмум а башхады: макъам тепсеуден алгъа барады, нек дегенде ол сезимлени ачыкълайды. Аланы уа къымылдауну, тебиуню болушлукълары бла кючлейбиз, алагъа тюрсюн беребиз. Жюрегиме жетген макъамны эшитсем, ол заманда тепсеу да къураялама, – деп белгилейди тепсеучю.

Бюгюнлюкде Жаболаны Анжела «Басият» ансамбльни хореограф-балетмейстериди. Ол тепсеу къауум Хасанияда 2005 жылда къуралгъанды. Ал кезиуде 16-чы номерли мектепде кюреше эди. Аны  башламчысы Бегийланы Заур болгъанды. Элде Маданият юй ачылгъандан сора, ансамбль  ары кёчеди. Быйыл ол къуралгъанлы онсегиз жыл болады. Ол заманнга анда тепсеучюлени алты тёлюсю алышыннганды. Сабийле республиканы кёп сахналарында тепсегендиле, андан сора да, Татарстанны эм Турцияны тюрлю-тюрлю конкурсларында да алчы жерлени алып тургъандыла. 

Шёндю Анжеланы башчылыгъында жангы номерле къурап, конкурслагъа хазырланадыла.