Боюнларына салыннган борчланы толтургъандыла

Бу кюнледе «Нарт» къонакъ юйде от ёчюлтюу бла байламлы юйрениуле ётгендиле. Аны ведомствону энчи къауумуну аслам адам жашагъан  кёпкъатлы юйледе тюшген отланы ёчюлтюуге хазырлыгъын тинтиу мурат бла бардыргъандыла.

Аллай бийик юйледе от ёрге терк кетеди. Букъу лифтлени, атлауучланы да терк алады. Ахыр этажлада хал бек къыйын болады. Солур онг болмагъаны себепли, адамлагъа болушлукъ тапдыргъан да тынч тюйюлдю.

Юйрениулени сценарийине кёре, къонакъ юйню 10 этажында от тюшюп, 11 этажгъа кёчеди. Андагъы халкъны къутхарыугъа букъу чырмау болуп, къутхарыучуланы жумушларын къыйыныракъ этеди. Битеу да объектде 80 квадрат метр жанады.

От тюшген кезиуде лифтлени хайырланыргъа жарамагъанын эсде тута, белгиленнген жерге жаланда атлауучла бла жаяу жетер амал барды. Энчи кийимледен сора да, къутхарыучуланы биргелерине солурча аппаратлары, балталары, каскалары, «женглери» да болургъа керекдиле. Алайгъа  Нальчикни 1 номерли от ёчюлтюучю-къутхарыу бёлюмню келечилери жетип, борчларын белгилегендиле.  Ала 4 къауумгъа юлешинип, къалай тап боллугъун тохташдырып, ишлерин алай башлагъандыла. Насос бла суу бериу отну терк ёчюлтюп, солуу кереклени хайырлана, адамланы этажладан тюшюрюуге себеплик этгенди. Алай бла, къысха заманны ичинде борчла толтурулуп, от ёчюлтюлгенди.

- Алгъадан салыннган борчла толтурулгъандыла, ызы бла уа хар бёлюмню да борчун къалай тамамлагъанына багъа бичилликди. Битеу да бу ишлеге РФ-ни МЧС-ни КъМР-де Баш управлениясыны энчи къауумундан 75 адам къатышхандыла, 15 техника хайырланылгъанды, - деп билдиргенди юйрениулеге таматалыкъ этген Анзор Кагазежев.

Къасымланы Аминат.
Поделиться: