Водительлени хазырлаугъа жууаплы къараргъа къараргъа керекди

Къабарты-Малкъарны Жамауат палатасында водительлени хазырлау, алагъа транспортда жолда жюрюрге эркинлик бериуню юсюнден жыйылыу болгъанды. Анга Жарыкъландырыу эм илму министерствону билим бериуде контроль этиу жаны бла управлениясыны башчысы Елена Жарикова, КъМР-де ГИБДД-ны управлениясыны башчысыны къуллугъун болжаллы халда толтургъан полицияны полковниги Дмитрий Сухорученко, аны орунбасары полицияны майору Рамазан Лигидов, Транспорт эм жол мюлк министерствону бёлюмюню таматасы Рустам Ортабаев, автошколаланы директорлары къатышхандыла. 

Жыйылыуну аллында палатаны экономиканы айнытыу, предпринимательствогъа болушлукъ этиу, жашау журт коммунал мюлк, курортла эм туризм комиссиясыны башчысы Владимир Павленко жолда жюрюуню къоркъуусузлугъу жамауат эм энчи транспортну жюрютген водительлени хазырлау бла къысха байламлы болгъанын чертгенди.

 Елена Жарикова билдиргенича, бюгюнлюкде республикада 35 автошкола барды, былтыр аланы саны 36 эди. Жамауат транспортну жюрютюрюк водительлени аладан жангызда ючюсюнде – министерствогъа бойсунууда болгъанларында - хазырлайдыла. «Бусагъатдагъы законодательствогъа тийишлиликде ГИББД-ны заключениясын алгъан организация, тийишли мюлк-техника хазнасы, битеу керекли документлери бар эсе, министерствогъа водительлени юйретирча лицензияны алыргъа келирге боллукъду, беш кюнню ичинде, кемчиликле жокъ эселе, алагъа болжалсыз лицензия берилликди. Ала ишлерине жууаплы кёзден къаллай бирге къарагъанларын тинтиуде уа аслам жерни профилактика иш алады, алай аны хайырлылыгъы уа кёбюсюнде бардыргъан адамланы кертичиликлери бла байламлыды», - дегенди ол.

Дмитрий Сухорученко МВД-ны ишини баш борчларындан бири автошколлада водительлени хазырлауну качествосун, аладан экзаменлени тийишлисича алыуну контрольда тутуу болгъанын белгилегенди.

- Алагъа багъа бичгенде теория эм практика экзаменлени биринчи кереден ахшы къаллай бир адам бергенин, школланы выпускниклерини хатасы бла жоллада ненча къыйын болум эсепленнгенин, алада адамла ачыгъанларын неда ёлгенлерин тохташдырыуду. Былайда сёз эки жылдан аз ишлеген водительлени юслеринден барады, - дегенди ол.

Бусагъатда машинаны алыкъа аз заман жюрютгенлени хаталары бла болгъан аварияланы саны азыракъды, былтыр аллай 33 болум эсепленнгенди, алада беш адам ёлгенди, 44-сю жаралы болгъандыла. Быйылны эки айында башлагъан водительле 6 авария этгендиле, алада адам ёлмегенди. Къыйын болумлагъа шофёрланы хазырлау бла байламлыды, школлада аланы юйретиуню качествосун игилендирирге тийишлиди. Былайда баш мурат транспортну жюрютюрге жангызда тынгылы юйреннген адамланы эркин этиу уллу магъананы тутады. Къырал автоинспекцияны эсеплери уа биринчи кереден экзаменлени ахшы бергенлени саны алай кёп болмагъанын кёргюзтедиле. Аны баш сылтауу уа школланы кеслерини водительлеге кандидатланы сейирлери артыкъ уллу болмагъанындады. Жарыкъландырыу эм илму министерство бла регионда Госавтоинспекция школланы мюлк-техника хазналарын тинтедиле, алай алада юйретиуню качествосун а сюзерге эркин тюйюлдюле. Бу болумну тюзетир ючюн, Дмитрий Сухорученко айтханыча, автошколланы рейтинглерин къураргъа эм аны Къырал автоинспекцияны сайтында басмаларгъа боллукъ эди. Сора, водительлени юйретген преподавательле кеслери да ДТП-ла эсепленнгенлерин бла къалгъанларын да тергерге керекди, дегенди ол.

Къабарты-Малкъар автомобиль-жол колледжни директору Мартин Абрегов а республикада асыры кёп автошкол болгъанын белгилегенди: «Автошколланы директорлары ишлерине бизнесгеча къарайдыла, окъутханлары ючюн ахчаны аладыла, иш андан ары къалай тамамланнганына уа контроль этмейдиле. Мюлк-техника хазналарыны юсюнден айтханда, автомат коробкалары бла автомобильле багъа болгъанлары ючюн аздыла. Дагъыда быллай болумну билеме: бир преподаватель кесини машинасында алты автошколада водительлени юйретгенин. Сора былайда къаллай качествону юсюнден айтыргъа боллукъду?»

Автомобилистлени битеукъырал обществоларыны республикада юйретиу арасыны башчысы Александр Цымбалюк а, жылгъа бир кере автошколланы директорларын жыйып, ишлерини эсеплерин чыгъарыу, аланы жангы методика эм законодательство бла шагъырейлендириу иги боллугъун билдиргенди.

Кульчаланы Зульфия.
Поделиться: