Кредит бериу ёсе барады

Россельхозбанкны Къабарты-Малкъарда бёлюмю быйыл биринчи кварталда адамлагъа 130 займны чеклеринде 100 миллиондан аслам сом бергенди. Ол а озгъан жылны бу кезиуюню кёрюмдюсюнден эки кереге кёпдю, деп билдиргендиле финанс учрежденияны пресс-службасындан.

Адамла бегирек да ипотеканы эмда абериге кредитлени сюйюп аладыла. Экинчилеринден быйыл 30 миллион чакълы сом берилгенди, ипотекадан а – 70 миллиондан артыкъ сом. Банкны розница портфелинде 65 проценти – ипотекады, отуз проценти уа аллай кредитледиле. Экинчисин бегирек да кёп банкны ара, сора дагъыда Залукокоажеде, Къашхатауда эмда Нарткъалада бёлюмлеринде бергендиле.

«Ёсюм бола баргъаны банкда излемле иги болгъанлары бла байламлыды. Адамла бизге ышанадыла, биз аны багъалай билебиз. Ахыр жыллада бёлюм иги эсепле кёргюзтюп башлагъанды. Кредитле бериуню андан да кёбейте барыргъа таукелбиз», - дегенди Россельхозбанкны Къабарты-Малкъарда бёлюмюню башчысы Алим Сокуров.