Эм иги психолог бла насийхатчы-устаз сайланнгандыла

Бу кюнледе  «Россейни устазы – психологу 2023» деген битеуроссей конкурсну регионлу  уруму бошалгъанды. Быйыл ол биринчи кере бардырылып,  Къабарты – Малкъарда психологланы усталыкъларын ёсдюрюрге себеплик этерикди.

Битеу да эришиуге онеки устаз къатышхандыла, ала барысы да  муниципал даражада хорлагъанла эдиле. Эки урумда онеки кючлю устала бир бирлери бла эришгендиле. «Иш къалай къуралгъаныны юсюнден» эм «Визитная карточка»  видеопрезентацияла хар устазны толусунлай ачыкълагъандыла. Сёзсюз, аланы араларында сынауу кёбюрек, толуракъ болгъанла да бар эдиле, аны бла бирге башхаланы уа билимлери теренирек болгъаны баям болгъанды. Ол затла тинтилгенден сора, экинчи тургъа жети устаз ётгенди. Аладан а бек кючлю юч устаз-психолог  белгиленнгендиле: Терек шахарда экинчи номерли школну устазы Надежда Бузыкина, Тырныауузда алтынчы номерли школну устазы Тилланы Ханий эм Нальчикни бешинчи номерли школуну устазы Карина Даурова. Хорлагъаннга   Карина Даурова саналгъанды.

Насихайтчыланы эришиулери да биринчи кере  бардырылгъанды. Бу битеуроссей конкурс бусагъатда школлада юйретиу ишге аслам эс бурулгъаны бла байламлыды. Хар сабий кесини халкъыны адетин-тёресин билирге, аны бла бирге интернационалист болургъа керекди. Алай  сабийлени  ол халда ёсдюрюр ючюн,  насийхатчыла  бек кёп къыйын саладыла. Ала ата – анала бла  да байламлыкъ жюрютедиле.

Насийхатчыла школгъа келген жангы устазлагъа да биринчи атламларын этерге болушадыла, дерслеринде олтуруп, кемчиликлерин айтадыла, аланы тюзетир амалланы кёргюзтедиле. Аллай тамата устазсыз бусагъатда келип школда ишлеп башлаялгъанла бек аздыла. Аны себепли юйретиучюлени, болушлукъчуланы магъаналары чексиз уллуду. Кёп директорла тамата устазла пенсиягъа кетебиз деселе, тилеп ишде тутадыла: аланы сынаулары башхалагъа болушады да, аны ючюн.

Бу эришиуге да онеки сынаулу  насийхатчы  къатышхан эди.  Биринчи кезиуден сора жетиси къалгъандыла, аладан бек кючлюге Бахсан шахарда тёртюнчю номерли школну насийхатчысы – устазы Юза Хажирокова саналгъанды. Лауреатла уа Галина Дудка, Рузэния Медведева, Зарета Жемухова, Жанна Дмитрян болгъандыла.

Байсыланы Марзият.
Поделиться: