Газ бла жалчытыу программа тийишдирилгенди

Къабарты-Малкъарда газ бла жалчытыуну айнытыу бла байламлы, кеси да 2021-2025 жылла бла чекленнген программагъа бизни республика бла «Газпром» ПАО къол салгъандыла, деп билдиргендиле «Газпром межрегионгаз Нальчик» компанияны пресс-службасындан.

Эсге сала айтсакъ, бешжыллыкъ программа 2020 жылда жарашдырылгъанды.  Алай бюгюнлюкге уа, регионну газ инфраструктура жаны бла излемлери жангыдан тийишдирилгенлери себепли, ол документге энтта да эки проект къошаргъа тюшгенди. Биринчиси  Май районда Баксанский элни ичинде газ быргъыла тартыу бла байламлыды. Экинчисини чеклеринде уа Бызынгыда альпинизм базагъа газ созаргъа керекди.

Жангыртылгъан программагъа кёре дагъыда эллени ичлеринде эмда араларында жети ыз ишлерге тюшерикди. Ол санда Тырныауузда вольфрам-молибден комбинатха да газ тартыллыкъды.

Аны бла чекленип къалмай, компания «Прималка», «Аргудан», «Старый Урух», «Новоивановка», «Малка», «Пролетарское», «Нарткала», «Нартан» станцияланы жангыртырыкъды эмда «Прохладный» станция ишлерикди. Аны хайырындан ызлагъа кёпле къошулургъа боллукъдула.

Регион да  юйлерине газ тартханлагъа кеси жанындан социал болушлукъ берип турлукъду.