Жаш медикле – чынтты патриотла

Къабарты-Малкъар къырал университетни   Медицина  колледжини студентлери «Билим бериу» миллет проектни чеклеринде бардырылгъан «Россей Федерацияны инсанларын  патриот сезимде юйретиу»  федерал проектге  къатышадыла. Анга кёре  РФ-ни Жарыкъландырыу министерствосу болушуп «По тылам фронтов» деген  регионла аралы  топографиялы оюнла ётдюрюледиле. Ол гуманитар эм бирикдирген проектле бла кюрешген    автоном коммерциялы болмагъан  «Образец» организацияны кючю бла  бардырылады.

Аны чеклеринде кёп болмай  Медицина  колледжни отуз  студенти  «Сыйлы урушла ёмюрлеге адам улуну эсиндедиле»  деген топографиялы квестге къатышхандыла.  Медколледжни  преподаватели  Биттирланы  Назифа айтханнга кёре, аны баш  магъанасы Уллу Ата журт урушну юсюнден студентлеге толуракъ билдириргеди. Аны бла бирге практика жанына да аслам эс бурулады. Ол санда картография, геоинформация системаланы  сервислери бла ишлерге юйренедиле. 

Квестге къатышханланы алгъышлай медицина колледжги тарыхден  преподаватели Ахматланы Заурбек Уллу Ата журт уруш бошалгъанлы 78 жыл болгъанын, алай аны кюйсюзлюгю бюгюнлюкде да жюреклени  къайгъы  этдиргенлей тургъанын айтханды. 

- Урушну кезиуюнде миллионла бла адамла ёлгендиле. Аллай къазауат жер жюзюнде бир да болмагъанды. Бизни къырал немис фашистлени ууаталса да, аны ючюн уллу багъа тёлегенди. Ол санда Къабарты-Малкъардан 38 минг эркегырыу бла тиширыу керти  жигитлеча  жанларын бергендиле. Бизни республиканы  къоруулай ёлген  Къызыл аскерчилени да  мингле бла санаргъа боллукъду.  Ата-бабаларыбызны кишиликлерин унутмазгъа, ёмюрлеге эсде сакъларгъа борчлубуз!- деп къошханды Ахмат улу.

Маршрутну ётерге чыкъгъан студентлеге алгъыш эм насийхат сёзлерин билдире къонакъла:  Нальчик шахарны ветеранларыны советини,  Россейни жазыучуларыны, журналистлерини  союзларыны келечиси,  отставкада полковник Валерий Шипилов, КъМКъУ-ну бирикген  ветеран советини председатели, оставкада  полковник  Хасан Шурдумов, медколледжни  биринчи ветеран  организациясыны  таматасы Гайыланы Сакинат, КъМКъУ-ну преподаватели  Хаути Пхитиков да сёлешгендиле.

Ызы бла Биттирланы Назифа  жаш «следопытланы» оюнню жорукълары бла шагъырей этгенди. Анда шахарны тийиресинде  Уллу Ата журт урушха аталгъан  сегиз объектни (станцияны) табаргъа эм аны бла байламлы  буйрукъланы толтурургъа керек болгъанды. Дерследе объектни  юсюнден тюз  эм толу хапар билдирирге тийишли эди.   Алай бла  жаш адамла урушда жоюлгъан Медицина училищени преподавательлери бла окъуучуларыны,  «Танк-34», Къабарты-Малкъарны 115-чи атлы дивизиясыны,  Совет Союзну Жигити Байсултанланы Алимни, Къулийланы Къайсынны,   Алиму Кешоковну «Аскер махтаулукъну шахары», «Биз эсде тутабыз» эм «Хорламны ёмюрлюк оту» эсгертмелени жокълагъандыла.

Ахырында чыгъарылгъан эсеплеге кёре, Медицина колледжни «Эдельвейс» къаууму хорлагъанды.  Квестге къатышханла федерал проектни   шагъатлыкъ къагъытлары бла саугъаланнгандыла.

Эсге сала айтсакъ,  «По тылам фронтов» деген регионла аралы  топография оюнланы финалы быйыл  Нижний  Новгородда ётерикди.