Предпринимательствону тарыхыны юсюнден олимпиада

Россейде предпринимательствону тарыхыны юсюнден бардырылгъан Битеуроссей тогъузунчу олимпиаданы бизни республикада кесеги кёп болмай Къабарты-Малкъар къырал аграр университетде ётгенди, деп билдиргендиле вузну пресс-службасындан.

Олимпиадагъа студентле бла аспирантла къатышыргъа эркин эдиле. Бу кере анга 150 адам къошулгъанды. Ала предпринимательствону тарыхыны, белгили адамланы, предприятияланы эмда аланы атларыны юслеринден соруулагъа жууапла берирге керек эдиле.

Алайды да, олимпиаданы ачхан кезиуде, алгъышлау сёзю бла КъМКъАУ-ну къошакъ билим бериу эмда тыш байламлыкъла жаны бла проректору Светлана Азикова, ФАС-ны КъМР-де бёлюмюню башчысыны орунбасары Залина Кунижева, Нальчикни прокуроруну болушлукъчусу Аскер Иванов, «Иш кёллю Россей» организацияны республикада бёлюмюню башчысыны орунбасары Елена Давыдова эм башхала сёлешгендиле.

Бу олимпиада КъМКъАУ-да 2014 жылдан бери бардырылады. Ол кезиуден башлап, анга Экономика эм управление факультетни деканыны экинчиси Зумакъулланы Фатима башчылыкъ этеди. Шёндю хорлагъанла уа эришиуню Москвада бардырыллыкъ кесегине къатышырыкъдыла.

Улбашланы Мурат хазырлагъанды.