Газ бла жалчытхан компания ишчиле излейди

Бийик билим берген учрежденияланы тауусханлагъа деп ишчи жерлени ярмаркасы бардырылгъан эди Нальчикде кёп болмай. Анга «Газпром газораспределение Нальчик» компания да къатышханды. Аны келечилери республикада кёк отлукъ бла жалчытхан бёлюмде къаллай усталыкълары болгъан адамла изленнгенин айтхандыла, студентлеге эмда выпускниклеге презентация да къурагъандыла.

«Газпром газораспределение Нальчик» бу ярмаркагъа хар жыл сайын къатышыучуду. Иш бла жалчытыу Ара бла байламлыкълагъа анда тийишли магъана бериледи. «Бизни компанияда ишлегенлеге тап онгла къуралгъандыла; ала социал жаны бла толусунлай жалчытынадыла, усталыкъ жаны бла ёсерге да амал барды. Сынамлары болмагъанланы уа предприятияны мурдорунда окъутабыз неда жангыдан юйретебиз», - дегенди аны башчысы Залим Вороков.