Эллени ючден бири суу къытлыкъ сынайды

Жай кезиуде   Къабарты-Малкъарны бир-бир эллеринде таза суу азайгъанына жамауатдан   кёп тарыгъыу  эшитирге тюшеди.  Аны бла байламлы кёп болмай «Эхо Кабардино–Балкарии» элледе бу жаны бла болумну билир муратда instаgram  социал сетьде   соруу бардыргъанды.  

«Белгилисича, республикада 8 шахар бла 172 эл барды. Бизге  аланы  53-ден  сёлешгендиле. Алай ол кемчилик, баям,  дагъыда кёплени  жарсытады.   Чыгъарылгъан эсеплеге кёре,   эллени ючден биринде таза суу  эркин келмей, алада жашагъанла къыйналадыла»,- - деп билдиреди «Эхо Кабардино-Балкарии». 

Адамла айтханнга кёре, бир-бир элледе сууну ыйыкъгъа бир кере жибередиле, Башхаларында аны арталллы да кёрмейдиле. Кертисин айтханда,     къысха заманда ол  кемчиликлени кетерирге  жарамазлыкъ жерле да бардыла. Сёз ючюн, ичер сууну азайгъаныны баш сылтауун таматала,  бахчаланы сугъаргъанларында кёредиле.  Алай къуллукъчуланы уллу кёллюлюклеринден хал  иги жанына  тюрленмеген элле  да  аз тюйюлдюле.