Россельхозбанк сабанчылагъа къайгъырады

Финанс учрежденияны Къабарты-Малкъарда бёлюмю шёндю башланнган сабан ишлеге къатышханланы кредитле бла жалчытады, деп билдиргендиле аны пресс-службасындан. Ахча азайтылгъан ставка бла бериледи.

Быйыл Россельхозбанк сабанчыланы 119,5 миллион сом бла онгдургъанды. Ол санда 77,8 миллион сомну ол халда (5 процент ставка бла) бергенди. Саулай айтханда, былтырны бу кезиую бла тенглешдиргенде, аграр бёлюмде уруннганла 14,5 процентге асламыракъ ахча алгъандыла бу банкдан.

Шёндю энтта да беш заявка барды сюзюуде. Ол 90 миллиондан аслам сом болады. Жылны ахырына дери уа банк, сабан ишлени тамамларгъа, 200 миллион сом берирге умутлуду.

Кредитге заявкала эл мюлк предприятияладан, элчи-фермер мюлкледен, энчи предпринимательледен да келедиле. Ахчаны отлукъ, техникагъа керекле, семиртгичле, урлукъла, башха затла сатып алыргъа къоратыргъа жарайды.

«Сабан ишле тынгылы бардырылсала, эл мюлк продукция да аслам болса, саулай бу бёлюм, экспорт онгла да кючлюрек боллукъдула. Россельхозбанк анга бек уллу эс бурады. Кредит излегенлени уа бар сурамларын жалчытыргъа къолубуздан келеди», - дегенди банкны регионда бёлюмюню башчысы Алим Сокуров.