Сынауланы эсеплери белгиленнгендиле

Окъуучуланы битеуроссей школ олимпиадаларыны 2022-2023 окъуу  жылда бардырылгъан кезиуюню регион урумуну эсеплери белгили болгъандыла. Алагъа тийишлиликде, Нальчикни мектеплерин алып айтханда, сынаулада хорлагъанланы саны жыйырма бир адамды. Призёрла уа элли бир  жаш бла къыз болгъандыла.

Алай бла республиканы школларыны арасында ара шахарыбызны  школлары биринчиликни ычхындырмагъандыла. Эм ахшы эсеплени уа экинчи номерли лицей (тёрт алчы жер бла сегиз призёр), онтёртюнчю гимназия (беш алчы бла тёрт призёр), жетинчи номерли гимназия (юч алчы бла тёрт призёр), бир-бир дерслени терен халда окъутхан тогъузунчу мектеп (эки алчы жер эмда беш призёр)  отуз ючюнчю номерли школ (эки алчы эмда алты призёр)  кёргюзтгендиле. Аладан тышында да, айырмалыланы арасында бешинчи, жыйырма жетинчи номерли мектепле да бардыла.

Ингилиз тилден, обществознаниядан, ОБЖ-дан бла орус литературадан сынаулада алчыла эмда  призёрле  болгъанла алай кёп да тюйюлдюле. Бу дерследен хунерлерин бийик даражада экинчи номерли лицейни тогъузунчу классыны окъуучусу Алиса Панкова (математикадан бла обществознаниядан алчы жерлеге тийишли болгъанды),  Ахмед Колбунов (33 школ, орус литературадан-алчы, обществознаниядан а призёр болгъанды), Дмитрий  Луценко (14 гимназия, испан эмда ингилиз тилледен алчылыкъны алгъанды), Алина Жирова (экинчи номерли лицей, испан эмда ингилиз тилледен призёр болгъанды).

Окъуучуланы битеуроссей школ олимпиадаларыны ахыр къырал даражалы уруму отузунчу апрельге дери бардырыллыкъды. Белгилисича, анда жыйырма тёрт дерсден боллукъдула сынаула. Анга уа регион кезиудеги сынаулада алчы жерлени алгъанла бла анга къатышыргъа эркинликлери болурча бир балл алгъан  призёрла чакъырылгъандыла. Аланы саны уа бу  жол саулай да къыралны регионларындан 6 500-ге жетеди. Сагъынылгъан къырал даражада хорлам болдургъан жашла бла къызла уа къайсы дерсден ахшы эсепле болдургъанларына тийишлиликде профильли бийик окъуу юйлеге Бир къырал сынауланы бермегенлей да киргеннге саналлыкъдыла.

Трамланы Зухура.
Поделиться: