Тынгылы жараула, ахшы эсепле

Элбрус районда спорт тири айныйды, ол а бу жаны бла иш тынгылы бардырылгъаныны эсебиди. Районну Физкультура эм спорт комитетини башчысы Жаппуланы Магомет айтханнга кёре, жараулагъа тийишлисича даража берилир эм спортчула жетишимли болур ючюн, спорт школла, аскер комиссариат, ДОСААФ-ны жер-жерли бёлюмю бла байламлыкъла жюрютюледиле, арада бир бирге себеплик да этиледи. Адамла аслам къатышхан физкультура мероприятияланы бла эришиулени жыл сайын жарашдырылгъан планнга кёре бирге ётдюредиле.

Энчи эс сабийлеге бла жаш адамлагъа бёлюнеди. Озгъан жылда алагъа спортну бла саулукъну онкюнлюгю, «Зауукълу стартла», тюрлю-тюрлю турнирле къуралгъандыла. Спорт школлада жараулагъа жюрюп, жетишимле болдургъанла уа  грек-рим тутушуудан, боксдан, каратеден, ауур атлетикадан тёрели регионла аралы эм битеуроссей турнирлеге къатышхандыла. Быллай эришиуле жыл сайын районда спортну айнытыугъа уллу къыйын салгъан белгили тренерлени бла спортчуланы хурметлерине аталып бардырыладыла.

Былтыр къыралны башха-башха регионларындан гёжефлени къаташыулары бла мында аслам эришиу къуралгъанды, ол санда боксдан «Россейни жашлыгъы» турнир, ауур атлетикадан бла каратеден округну биринчиликлери. Бильярддан, гитче-футболдан, баскетболдан бла волейболдан эришиуле ётдюрюлгендиле. Алагъа 2500-дан аслам адам къатышхандыла. 

Районну 420 спортчусу тышында турнирледе сынашхандыла. Аланы араларында каратеден дунияны чемпионаты, грек-рим тутушуудан, боксдан бла каратеден Россейни чемпионатлары, ауур атлетикадан къыралны кубогу, каратеден «Кубок АК-Барс», «Каспийни кубогу», «Петербург кюз арты – 2022», грек-рим тутушуудан къарындашла Самургашевлени саугъаларына ХХ халкъла  аралы турнир, спорт тутушуудан Совет союзну Жигити М.А. Аксёновну мемориалы, Поддубныйни лигасы, ауур атлетикадан РСФСР бла СССР сыйлы тренери Ю.П. Саркисянны бла Россейни сыйлы тренери В.Ф. Соколов хурметлерине эришиу бардыла. Алада жетишимле аслам болгъандыла, бютюнда спортну кюч тюрлюлеринде. Эки эм уллу турнирде – Россейни чемпионатында бла Спортну жай тюрлюлеринден спартакиадада – Локияланы Жамболат кюмюш майдалланы къытханды. Экинчи жерге къыралны биринчилигинде Локияланы Руслан чыкъгъанды. Бапиналаны Къурман Москваны чемпионатында бла СССР-ни спортуну устасы С. Тараскинни хурметине аталгъан турнирде хорлагъанды. Ёзденланы Заурбек къарындашла Самургашевлени эм Россейни сыйлы тренери В.В. Хромовну саугъаларына ётдюрюлген битеукъырал эришиуледе жетишимли болгъанды. Поддубныйни лигасында «алтынны» Малкъарны Омар алгъанды. Округ даражалы эришиуледе атларын Кацийланы Абдурахман бла Сотталаны Адильгерий айтдыргъандыла. 

Хорламла бла ауур атлетчиле да къууандыргъандыла. Аслан Каскулов Россейни кубогундан «кюмюшню» келтиргенди, Гюлюйланы Тамерлан а къыралны биринчилигинде хорлагъанды. Россейни жаш тёлю биринчилигинде ючюнчю жерге Къадырланы Махмут чыкъгъанды. СКФО-да «кюмюшню» Алина Малухова къытханды, Къачмазланы Герман а битеукъырал турнирде экинчи болгъанды.

Каратеде Россейни кубогунда эм кючлю Вера Ковалёва болгъанды, къыралны чемпионатында уа - Керим Алихаджиев. Алихаджиев бла Андрей Вихорь Россейни юниор биринчилигинде – «алтынны», Къурманланы Коншао-Бий а «кюмюшню» къытхандыла. Ала барысы да Каспийни кубогунда да усталыкъларын кёргюзтгендиле. Алихаджиев дагъыда «Кубок АК-Барс» кубокда хорлагъанды, Эльмира Хаджарова да саугъаланнганланы къауумуна къошулгъанды. Вера Ковалёва бла Ислам Юнусов «Петербург кюз арты – 2022» халкъла аралы эришиуде «доммакъланы» алгъандыла. Майдалсыз боксчула да къалмагъандыла. «Россейни жашлыгъы» чемпионатда Макытланы Хасан – биринчи, Гижгиланы Юсюп а экинчи жерлени алгъандыла.

Жетишимли гёжефлеге даражалы спорт атла берилгендиле: грек-рим тутушууда Махийланы Азрет-Али бла ауур атлетикада Алина Малухова спортну усталары болгъандыла. Спортну устасына кандидатны нормативин Кацифланы Абдурахман, Зариф Минасов, Жашууланы Хасан, Тёппеланы Жандар, Джаппуланы Таулан бла Тамерлан, Ёзденланы Заурбек, Эльмира Хаджарова, Къартлыкъланы Абдрухман толтургъандыла. Асламлы разрядланы 186 гёжеф, 8 ауур атлетчи, 10 боксчу, 15 каратечи алгъандыла. Футбол эм баскетбол бла кюрешген 17 сабий да разрядлагъа тийишли болгъандыла. Локияланы Жамболат грек-рим тутушуудан къыралны миллет жыйымдыкъ командасына киреди, Аслан Каскулов а – ауур атлетикадан. Юниор эм жаш тёлю жыйымдыкъ командаланы санында Гюлюйланы Тамерлан, Багъатырланы Таулан, Лукияланы Руслан, Джаппуланы Ислам эришедиле, Алина Малухова жаш тёлю команданы резервинде.

Быйыл да районну спортчулары жетишимле болдурлукъларыа ишеклик жокъду. Бюгюннге Локияланы Жамболат Россейни грек-рим тутушуудан чемпионатында – экинчи, боксдан МВД-ны чемпионатында Алийланы Малик – экинчи, каратеден Бирлешген Араб Эмиратлада болгъан халкъла аралы турнирде Керим Алихаджиев ючюнчю болгъандыла. Дагъыда талай жаш гёжеф кеслерини ауурлукъ къауумларында, округ эришиуледе саугъа жерлеге чыгъып, Россейни биринчилигине къатышыргъа эркинликни къоруулагъандыла.  

Кульчаланы Зульфия.
Поделиться: