«Шуёхлукъ жюрюте билиу насыпны бир тюрлюсюдю»

Каратеде бла къол тюйюшде жетишимле болдургъан спортчуларыбыздан бири Герийланы Русланды. Ол регион, округ, къырал даражалы эришиуледе хорлагъанланы къауумуна дайым киргенлей тургъанды, кёп сермешин болжалдан алгъа да бошагъанды. Бийик усталыгъы, хорламгъа итиниулюгю ахшы эсеплеге да келтиргенди – анга Россейни спортуну устасы деген ат берилгенди.

Руслан Бабугентде туугъанды, гитчелигинден да спортха сейири болгъанды. «Атам Герийланы Хусейин тренерди, спортха кёлю-жюреги бла берилген адамды. Ол командабызны тутушуугъа бла къол тюйюшге юйретгенди, спортну бу тюрлюлерине тёрт жылны юйреннгенме. Бир кесек замандан а ол аскер къол тюйюшден секцияны ачханды, школну бошагъынчы ары жюрюгенме», - дейди ол.

Студент заманында беш жылны ичинде къол тюйюшден жараугъа Нальчикде тренер Хачим Мамхеговха жюрюгенди, округ эришиуледе кёп кере хорлагъанды, къыралны биринчилигинде «алтынны» тёрт кере алгъанды, кубокну къытханды, Россейни чемпиону болгъанды.

Эм магъаналы хорламына жаш Россейни биринчилигинде биринчи кере алгъан «алтынын» санайды. Ол анга бек жууаплы эришиу эди, анга къатышханда арыгъыракъ болургъа да тюшгенди. Анга хазырланнган кезиуюнде, эришиуге атланыргъа бир кюн къалгъанда, юйлеринде баняны окъуна кюйдюрюп ийгенди. Биринчиликде къытханында жангы даражагъа чыкъгъанын ангылагъанды.

- Жарау манга бек сейир кёрюннгенди, залгъа кесибизден таматаракъла да келгендиле, ала да, тренерлерибиз да бизге иги болгъандыла. Сора, ол кезиуде, сабийликден болур, жараугъа оюннгача къарагъанма, залгъа заманымы зауукълу ётдюреме деп келгенме. Абаданыракъ болгъанда ангылагъанма бу ишни магъанасын, сора жарауума да жууаплы кёзден къарап башлагъанма. Атам юйретгени себепли, менде уллу жууаплылыкъ болгъанын ангылагъанма. Не тюрлю упражненияланы да, ма муну уа этмезге да жарарыкъды дегенчаланы да, тынгылы толтурургъа кюрешесе. Залда къолдан келгенни аямагъанлай, башхалагъа юлгю болургъа кюрешгенме, - деп эсгереди гёжеф.

Спорт бла кюрешгенинден тышында Руслан бийик усталыкъ билим алыргъа да жетишгенди, ол муратын толтуруугъа Къабарты-Малкъар къырал аграр университетге киргенди, «Землеустройство» жаны бла окъугъанды. Анда жарау этерча зал бар эди, жолгъа кёп заман къоратмазча, къатында общежитияда жашагъанды, алайдан залгъа жаяу бир-эки минутха жетерге боллукъ эди. Спорт а билим алыугъа чырмау угъай, себеплик окъуна этгенди. Юйрениу-жарау этиу жыйылыугъа бир жары кетсе да, окъууумда артха къалмазгъа кюрешгенме.

- Спорт бла кюрешиуню ахшы жанлары асламдыла. Аладан бири уа тенгле кёп болгъанларыды, - дейди ол. - Битеу къыралда да танышларым бардыла. Вузда залыбызда республикабызны жер-жерлеринден жаш адамла, студентле жыйылгъандыла, анда шуёхлукъ кёп адам бла болгъанбыз, бюгюн-бюгече да бир бирибиз бла байламлыкъны юзмегенбиз. Шуёхлукъ жюрюте билиу ол да насыпны бир тюрлюсюдю, анда тенгинге кертичи болуу, кёзбаулукъ этмеу, алдатмау бек уллу жерни аладыла.

Спортда жетишимли болур ючюн, адамгъа къаллай ышанла керекдиле деген сорууума жууап бере, Руслан, бек алгъа, жарауну тынгылы этерге кереклисин чертеди: «Къарыуунг саркъаймазча, кюнден-кюннге кюч ала барырча, бир кюнню да жараусуз ычхындырмазгъа. Экинчиси уа, итиниулюкдю, салгъан муратынга ажашмай, буюкъмай барыуду. Хау, аны ючюн бир талай затдан къуру къалгъанча да боласа, сёз ючюн, солургъа бош заманынг къалмайды.  Тюз ашау, заманында жукълау да магъаналыды да, низамны бузмаз ючюн а, психология жаны бла кючлюлюк изленеди».

- Жашауум саулай да спорт бла байламлыды. Волгодонскда Россейни чемпионатында саулугъума чып тюшгенини хатасындан бусагъатда эришиулеге къатышмайма. Алай аны ючюн жараууму къоймагъанма, ишимден сора залгъа келип, атам бла сабийлени юйретеме, ала да ахшы кёрюмдюлери бла къууандырадыла. Республикадан тышына кетерге умутум а жокъду. Спорт адамны эсин - ниетин кючлейди, кесини къарыууна ышаныргъа юйретеди. Жангызда кючлю болуу азды, инсан акъыллы, билимли болургъа да тийишлиди. Битеу бу шартла бирге инсанны кючлю этедиле. Аны ючюн мен спорт бла кюрешгенле билимли, адежли да болурла жанлыма, - деп белгилейди Руслан.