Чайырны хатасы

Игимиди чайыр саулукъгъа, огъесе аманмыды? Нарткъалада район больницаны врачы Бёзюланы Залимхан: «Реклама чайырны тишлени жуугъанда хайырланыучу пастагъа тенг этерге аздан къалгъанды. Биз барыбыз да билебиз ол кариесни айныууна чырмаулукъ этгенин. Болсада реклама чайырны заранлы затларыны юслеринден а абери айтмайды.

Ол  адамны  тишлерин  кариесден  къоруулагъанны  къой,  стоматологла  салгъан  затланы  –  пломбаланы,  коронкаланы,  «кёпюрлени»  (мостланы)  тозуратады.  Болсада  ахыр  кезиуде  чайырны  хайырлы    «ишлерин»  да  ачыкълагъандыла  – ол  сокъур чегиде этилген операцияны терк сау этерге болушады. Алай этерге анга ашны эритиучю системаны гормонларын тирилтиу бла болушады. Бек  сейири  уа,  чайыр  адамны  сагъышын,  къайгъысын  кетерирге  болушханыды:  ол  шошайыргъа,  аны  къой,  эсни  жыяргъа,  хар  затны  эсеплерге  окъуна  себеплик  этеди», - дегенди.

Болсада, бизни ушакъ нёгерибиз чайырны хаталы затларын чертгенди: жаякъны шаугютлери керексиз кючленедиле. Дагъыда чегилени ишлеулери  бузулады, сабийле чайырны жутсала. Дагъыда балачыкъла тохтамай  аны  чайнап турсала, тёбен жаякъла эм къулакъ жанла ауруйдула, ачыйдыла.  Сора пломбаланы, «кёпюрлени», къоронкаланы, башха стоматология  конструкцияланы да бузады чайыр чайнау.   Адамны чархында гинасуу  (ртуть)  кёбейирге да болады.

Ол терс тамакъгъа кетсе, солуу ызла бегитилип къалыргъа боладыла. «Чайырны хатасы хайырындан кёпдю, аны сабийлеге берирге керек тюйюлдю», - деп эсеплейди  Бёзюланы Залимхан.

Байсыланы Марзият жазып алгъанды.
Поделиться: