Ишчи ачыгъан кезиуде тёлеуле тюрленнгендиле

Къоркъуулу предприятияда аварияны хатасындан ишчини саулугъуна салыннган заран ючюн тёлеулени ёлчеми кёбейтилгенди. Ол жаны бла законну РФ-ни Къырал Думасы бла Федерация Совет къабыл кёргендиле эмда РФ-ни Президенти къол салгъанды.

 Алай бла «Къоркъуулу объектде аварияны хатасындан саулукъгъа заран салыннганда, объектни иесини граждан жууаплылыгъыны юсюнден» федерал законнга тюзетиуле кийирилгендиле. Алагъа кёре, страховой тёлеуле бла адам этген къоранчланы къайтаргъанда  ахчаны ёлчеми кёбейтилгенди.

Сёзге, адамны жашаууна бла саулугъуна салыннган заран ючюн тёлеу  2 миллиондан 3 миллионнга дери ёсдюрюлгенди. Неда аварияда ауушханны басдырыргъа къоранчлагъа  алгъын 20 минг сом берилген эсе, энди 40 минг сом тёленирикди.

 Адамны саулугъуна салыннган заранны хатасындан аны жашау болуму тюрленнген  эсе уа, 300 минг сом берилликди. Алгъын аны ёлчеми 200 минг болгъанды. Инсанны мюлкюне хата тюшген кезиуде да этилликдиле тёлеуле – алгъын аны ёлчеми 500 минг сом болгъанды, энди 750 мингнге дери кёбейтилгенди. Организацияны ырысхысына салыннган эсе уа хата, тёлеуню ёлчеми 1 миллион сомгъа жетерикди. Алгъын – 750 минг сом болгъанды.

 Аны бла бирге  къоркъуулу объектни иеси тёлеген страховой взонсла да тюрленедиле. Аны ёлчеми ачыгъанланы санына кёре тохташдырылады.

Тикаланы Фатима хазырлагъанды.
Поделиться: