Жолланы жангыртыугъа – аслам эс

Быйыл Къабарты-Малкъарда жоллагъа тынгылы ремонт этилирча тёрт миллиарддан аслам сом бёлюнюрюкдю.  Ол санда Каменномостское - Хабаз, Эски  Черек - Жемтала - Сукан-Суу, Вольный Аул - Хасания – Герпегеж участокла да жангыртыллыкъдыла. Саулай алып айтханда, игилендириу жаны бла  ишле жыйырма элде тамамланырыкъдыла. 

Аны кезиуюнде жолланы мурдорлары кючленирикди, кенгертилликди, асфальт жайыллыкъды, чыракълы чыпынла, темир буруула,  светофорла, белгиле, камерала да салынырыкъдыла. Кёпюрле, регион магъаналы жолла да мардалагъа келиширча этилликдиле.  

Бюгюнлюкде  эм уллу проектледен бирине  Экинчи Чегем – Булунгу жолну санаргъа боллукъду.  Быйыл жыл башланнганлы «Къоркъуулу  эм качестволу автомобиль жолла» миллет проектге кёре, Хушто-Сыртдан  Чегем чучхурлагъа дери кесегинде подряд организацияны келечилери   жолну тар эм къоркъуу жерлерин  кенгертирча жумушла бла  кюрешередиле.  Аны чеклеринде Чегем сууну жагъаларына темир свайла урадыла,  бетондан хунала  къуюп кючлендиредиле. 

Эсге сала айтсакъ, Экинчи  Чегем – Булунгу участокну жангырытыугъа ахча бёлюнюрюн  КъМР-ни Башчысы  Казбек Коков РФ-ни Президенти  Владимир Путин бла тюбешгенинде  сагъыннгандан сора  къабыл кёрюлген эди. 

Алгъаракълада Тёбен Чемден  Хушто-Сыртха дери онеки километр чакълы бирде жолгъа тынгылы ремонт этилип бошалгъанды. Жамауатны тилеги бла   республиканы Башчысы буюруп  чыракълы чыпынла да орнатылгъандыла.

Объект таулада, аны бла бирге суу боюнунда орналгъаны себепли  эм къыйын учатокга  саналады. Жаз башында  къар буз къыстау эрип тебиресе,  черек да танг кесекге кётюрюллюкдю. Чучхурланы тийресинде жол кенгертилгенден сора да, къоркъуусузлукъ жалчытылынырча мадар этилликди. Ол санда тротуарла, жаяу жюрюгенле солурча  зонала, къараучу майданла  да къураллыкъдыла.     

Саулай алып айтханда, былайда  ишлени 2024 жылгъа бошар мурат этиледи.  Ызы бла Булунгугъа баргъан жолну тапландырып  башларыкъдыла.  

Аны бла бирге  Хасанияда да жолну аслам кесегине къараллыкъды. Бусагъатда жолчула Атто улу орамда кир эм таза суу баргъан быргъыланы салып бошай турадыла.  Алгъындан бери тургъан коммуникацияла болгъан  ауурлукъгъа тёзалмайдыла, ол себепден терк-терк бузуладыла.  Планнга кёре, ишле тёрт километр чакълы бирде тамамланырыкъдыла.

 Ишлени бу кесегин быйыл майгъа бошар умут барды, андан сора  подряд организацияны келечилери элни ара орамларын  тапландырып, мардалагъа келиширча этип  башларыкъдыла. Объект толусунлай жангы излемлеге кёре жарашдырыллыкъды.