Сынамлы устаз

Темиржанланы Фатимат Ибрагимовна Ташлы-Таланы орта школунда устаз болуп ишлегенли 50 жылдан атлагъанды. Къабарты-Малкъар къырал университетни  бошагъандан сора, орус тилден бла адабиятдан дерсле берип тургъанды, отуз эки жылны ичинде уа башланнган класслагъа жюрюгенлени окъутады.

Мындан алгъа элде газет окъуучула бла  тюбешиуюбюзню мектепде бардыргъаныбызны себебинден, ары жыйылгъанла барысы да бир кибик, Фатимат Ибрагимовнаны юсюнден материал жазсагъыз эди, биз ыразы боллукъ эдик. Ол  мында окъутмагъан хазна сабий болмаз, аны билимлиги, школгъа биринчи кере келген сабийлеге харфланы танытыргъа, окъургъа, жазаргъа салгъан къыйынын бир адам да унутмагъанды, деп тилеген эдиле.

Ушагъыбызны кезиуюнде ангылагъан эдик, эллилени Фатимат Ибрагимовнаны юсюнден айтханлары тюз болгъанларын. Аны кесини эрттеден бери гитче класслада окъугъанланы юйретиуде хайырланнган белгили амаллары барды. Ол да тасха тюйюлдю, алгъын  башланнган класслада совет школаны бла шёндюгю заманны излемлерин да эсге алып, кеси сынагъан эм окъууда ахшы кёрюмдюле да болдургъан амалладыла ала.

Кёрюмдюлери уа бардыла. Саулай алып айтханда, Ташлы-Таланы школчулары район, республикалы даражада да жетишимле болдурур ючюн къалмайдыла. Тюрлю-тюрлю район эм республикалы конкурслада, спорт эришиуледе да ташлы-талачыланы саугъалары асламды эм белгилерчады. Битеу саугъалары школну отоууну бир къабыргъасы алып тургъаны уа бизни сейирге окъуна къалдыргъан эди. Аланы ичинде, айтханымча, даражалы, эс бурурчалары да бардыла.  

 Энтта да бир шарт: 52 жылны ичинде ол бек аздан жыл сайын 15 сабийни окъутуп тургъанды, аланы бирин да унутмагъанды. Бюгюнлюкде элде устазла болуп ишлегенле да бардыла. Фатимат Ибрагимовна Цаколаны Тахирни къызы Жамиляны, Занибекланы Харунну жашы Ахматны, Эристауланы Исаны къызы Лидияны, Гузиланы Жамалны жашы Мусаны, Сараккуланы Махмудну жашы Мусаны, Сараккуланы Якъубну жашы Зейтунну, Гумаланы Далхатны жашы Ильясны атларын ёхтемленип айтханды.    Сагъынылгъанла эм башха педагогла да билимлерин, сынауларын да сабийледен аямагъан, ишлерине уллу кёллю болмагъан, школда ууакъ, уллу жумуш  болса да  узакъ болжалгъа салмай тамамлагъан, тынгылы устазла болгъанларын чертгенди. 

Белгилерчады, Фатимат Ибрагимовнаны жангыз сабийи Тотурукъланы Тахирни жашы Рустам да устазлыкъны сайлагъанын. Ол да кёп жылланы элни мектепде ишлеп тургъанды.  Шёндю Кенжеде жашайды, Нальчикде эки мектебинде сабийлени окъутады.

Белгилерчады, бу назик тиширыу жашауда тюбеген сынауланы да тёзюмлю  таулу тиширыуча ётгенин. Эгечи  Нальчикде авариягъа тюшюп, жашаудан замансыз кетгенде, аны къызын, Мариямны, кесине алып ёсдюргенди. Алай сынау анга алыкъа алда эди,   анасы да андан сора къыйын ауруйду. Тёшекден хазна къопмай, тогъуз жыл жатханды,  сора дуниясын алышханды. Ол кезиуледе Фатимат Ибрагимовнаны бир кюн да тынчлыгъы болмагъанды, школда сабийле, юйде уа, айтханыбызча, анасы.  Мариям школну бошагъандан сора, бийик билим алыр ючюн, кючюн, къарыуун да аямагъанды. Къабарты-Малкъар къырал университетде экономика билим алып, Мариям Моллаланы Магометхан бла шёндю Вольный Ауулда толу юйюр болуп жашайды, иши да усталыгъына кёре болгъанына Фатимат Ибрагимовна неден да  бек къууанады.  

Ол кеси да бюгюнлюкде да тириди, башха тау эллени устазлары бла да шёндюгю амалланы хайырлана, байламлыкъ жюрютеди, билим бериуде не жангычылыкъ бар эсе да, аланы сабийлеге тюшюндюрюрге кюрешеди.

 Кёп жылланы билим бериуде ахшы кёрюмдюле болдуруп эм тынгылы ишлегени ючюн, Темиржанланы Фатимат Ибрагимовна Лескен районну администрациясыны сыйлы грамотасы бла саугъаланнганды. Анда сора аны элни, школну администрациясыны да бардыла сыйлы грамоталары.

Бизни корр.
Поделиться: