Россейни кубогу - Нальчикде

Нальчикде эстетика гимнастикадан Россейни кубогу бардырылгъанды. Анга 21 команда къатышханды, алагъа 16 жыллары толмагъан къызла киргендиле.

Биринчи юч жерге чыкъгъан гимнасткалагъа Россейни спортуну устасы деген ат эм къыралны атындан дунияны кубогуна бла чемпионатына къатышыргъа эркинлик берилгенди. Эсеплеге кёре, алчы жерлени барысын да москвачыла алгъандыла: биринчиге «Экспрессия» къауум, экинчиге – «Мадонна», ючюнчюге уа «Амуаж» чыкъгъандыла.

Кубокну чегинде дагъыда «Тауланы макъамлары» деген ачыкъ эришиу къуралгъанды. Анда 12-14-жыллыкъ спортчуланы араларында «алтынны» Къалмукъну «Аура» къаууму къытханды, экинчи бла ючюнчю жерлени уа бизни республикадан «Эльбрус» бла «Эльбрус-Олимпия» алгъандыла. 10-12-жыллыкъланы араларында Москва областьны «Сириус» къаууму хорлагъанды. Сверловск областьны «Легенда» командасы – экинчи, Къабарты-Малкъарны «Эльбрус-Вершина» къаууму уа ючюнчю болгъандыла.