Умуту - кезиулю биринчиликде хорларгъа

Ленинград областьны Выборг шахарында 17 жыллары толмагъан гёжефлени араларында ауур атлетикадан Россейни биринчилиги бардырылгъанды. Анга 59 регионундан 500-ден аслам жаш бла къыз къатышхандыла.

Анда Элбрус райондан спортну устасына кандидат Багъатырланы Таулан эришгенди. Ол 89 килограмм ауурлукъда сынаша, биринчи керелеринде штанганы халатсыз кётюргенди: 113 килограммдан башлап ауурлукъну 130-гъа жетдиргенди, алай, жарсыугъа, анга къошалмагъанды. Бу эсеп бла ол саугъаланнганланы къауумуна кирмегенди, тёртюнчю жерни алгъанды. Аны тренери Муаед Шаов билдиргеннге кёре, Россейни биринчилигине Таулан, саулугъуна чып тюшюп, операция этилгенинден сора къатышханды. Энди ол къыралны кезиулю биринчилигинде эриширикди.