Болушлукъ излегенлеге къайгъыра

Алгъа жылладача, былтыр да Элбрус районну халкъланы социал жумушларына жууаплы араны келечилери адамланы жумушларына къарагъандыла. Ала юйюрлеге бла сабийлеге психология-педагогика болушлукъну этгендиле, соруула бла келгенле бла сёлешгенле. Алай бла къыйын жашау болумгъа тюшген бир инсан да болушлукъсуз къалмаз ючюн кюрешгендиле, керек болгъанлагъа юйлерине баргъандыла, стационар, жарым стационар халда да ишлегендиле.

Адамлагъа юйлерине барып эки бёлюм ишлегенди, биринчиси – Тырныауузда, Быллымда, Огъары Бахсанда бла Элбрусда, экинчиси уа – Кёнделенде, Бедикде, Лашкутада. Алада эсепде 270 адам бардыла, аладан 110-у шахарда жашайдыла. Бёлюмлени келечилери битеу да 106 230 социал-турмуш бла медицина жумуш тамамлагъандыла, адамланы юйлерин бла арбазларын жыяргъа, аш-азыкъ хазырларгъа, коммунал тёлеулени этерге болушхандыла, саусузланы къан басымларын ёнчелегендиле, массаж этгендиле.

Терк социал болушлукъ этиу бёлюм а абадан жыл санда инсанлагъа, сакъатлагъа, кёп сабийли эм файдалары аз юйюрлеге, себеплик керекли инсанлагъа къарагъанды, аланы исси азыкъ, аш хуржунла, кийимле, чурукъла бла жалчытхандыла. Аны бла 960 инсан хайырланнгандыла. Былайда спонсорланы къошумчулукъларын да белгилерге тийишлиди, ала 82 693 сом багъасы 86 аш-азыкъ хуржун жыйышдыргъандыла. Жандауурлукъ ишге районда жашагъанла да тири къатышхандыла. Ала 5 084 кийим бергендиле, аланы 73 адам алгъандыла.

Гражданладан келген заявлениялагъа кёре, аланы мюлк-турмуш болумлары тинтилип, алты акт жарашдырылгъанды. Мобильный бригада 99 инсанны жумушлары бла кюрешгенди, ол санда пенсиячыланы бла сакъатланы да.

Абаданла бла чекленнген онглары болгъанла араны кюндюзгю бёлюмюнде саулукъларына къаратхандыла. Алай бла анда тогъуз къауум – 260 адам саулукъларын кючлегендиле. Элледе жашагъан къартла уа кече да тургъандыла. Аланы кюннге юч кере ауузландыргъандыла, профилактика багъыуну бардыргъандыла, кёллерин кётюрюрча маданият программа да къуралгъанды. Къулийланы Къайсынны атын жюрютген культура юй, Сабийлени эм жаш тёлюню чыгъармачылыкъларын айнытыу ара, Искусстволаны сабий школуну артистлери бла къауумлары алагъа концертле бергендиле.

Юйюрлеге бла сабийлеге психология-педагогика болушлукъ этиу бёлюмню борчу уа къыйын жашау болумгъа тюшгенлени ачыкълау, балаланы социал ёксюзлюкден сакълау болгъанды. Ол 93 юйюр бла ишлегенди, аладан онусуну сакъат сабийлери барды, къыркъдан асламысы уа – кёп сабийлидиле, жыйырма экисинде ата неда ана жокъдула, онтогъузуну да файдалары азды. Социал патронажда 82 юйюр тургъандыла, аланы араларында осал къылыкълы юйюрле да.

Андан тышында, сабийле атылып къалмазча, аланы социал ёксюзлюкден, гитчеле законнга бузукълукъ этмезча, терс жолгъа сюелмезча мадарла этерге кюрешгендиле. Профилактика органланы келечилери бла араны ишчилери къыйын неда къоркъуулу болумлагъа тюшген юйюрлени реабилитацияларын бардырырча тёрт план жарашдырып, аланы жашауда толтургъандыла. Ала бла ишлеуню жангы амаллары кийирилгендиле, аны хайырындан законнга сабийлени къатышыулары бла этилген бузукълукъланы саны азайгъанды. Инсанны энчи шартларын эм ата-аналаны бла балаланы араларында халланы тинтирча психология диагностика бардырылгъанды, аны себеплиги бла тёрт юйюрню къыйын болумдан чыгъаргъандыла, алада бусагъатда ахшы жанына атламла эсленедиле. Дагъыда жети адамгъа ишге кирирге себеплик этилгенди.

Социал-турмуш жумушланы тамамлагъан бёлюмде льгота халда чач къыркъдырыргъа неда абери тикдирирге боллукъду. Анда 2 479 адамны 3 726 жумушу толтурулгъанды. Хакъ бла этилген ишледен араны мюлк-техника хазнасын игилендириуге 287 483 сом жиберилгенди.

Гражданлагъа социал болушлукъ этиу, араны ишчилерин методика литература бла жалчытыу, жангы технологияланы сингдириу бла къурау-методика эм консультаця бёлюм кюрешгенди. Аны бла бирге сакъатлыкълары болгъан адамлагъа ишге кирирге болушурча соруу бардырылгъанды, адамланы юридический эм башха сорууларына кёре консультацияла бардырылгъандыла. 

Алай бла жылны ичинде 4 440 адамны 230 676 жумушуна къаралгъанды.

Кульчаланы Зульфия.
Поделиться: