Аналыкъ капиталны турмушну игилендириуге

 Аналыкъ капиталны программасы ишлеп башлагъанлы Къабарты-Малкъарда аны болушлугъу бла 63 772 юйюр жашау-турмуш болумларын игилендиргендиле, жангызда 2022 жылда аланы саны 4 054-ге жетгенди. Адамладан январьдан бери келген заявленияланы 81,1 проценти да аны юсюнден болгъанды.

2 804 юйюр капитал ахча бла юйню ишлерге неда сатып алыргъа берилген кредитлерин толусунлай жапхандыла неда аны биринчи тёлеуюн этгендиле. Дагъыда 1250 юйюр турмушларын банкдан борч алмай игилендиргендиле. Бу ишлеге фонд 2 212 038 599 сом бёлгенди.

Адамла сертификатны бу муратлагъа бютюн тынч хайырланырча, фонд 2020 жылда кредит организацияла бла келишимле тауусханды. Аны ючюн ата-ана банкда юйлерин алыргъа неда ишлерге кредитге заявление жазгъанда аны биринчи тёлеуюн, процентлерин неда баш борчларын капитал бла тёлериклерин белгилерге боллукъдула. Алай бла фондха барырлары изленирик тюйюлдю. Заявленияны бла керекли документлени банкла фондха электрон амалла бла жибередиле, алай  бла алагъа къарауну болжалы къысхартылады.

Капиталны турмуш болумланы игилендириуге аны алыргъа эркинлик берген сабийге юч толгъандан сора хайырланыргъа жарайды. Алай ол ахча кредитни биринчи тёлеуюн неда ары дери алыннган борчну жабаргъа керек эсе, сертификатны бала туугъанлай алыргъа боллукъду.

Кульчаланы Зульфия.
Поделиться: