«Фринц зёрмеле» алчылыкъны жибермегендиле

Ана тилни халкъла аралы кюнюне жоралап КъМКъУ-ну Отарланы Керим атлы маданият арасы педагогикалы колледжде «Таулу болургъа ким сюеди?» деген ат бла эришиуню къурап ётдюргенди. Анга КъМКъУ-ну бла КъМКъАУ-ну студент къауумлары къатышып, ана тиллерин къалай билгенлерин ачыкълагъандыла.

Саулай да анга алтышар адамдан къуралгъан 11 къауум къатышхандыла. Жаш тёлю командаларына да чам халлы атла берген эдиле: «Фринц зёрме», «Къатхан лёкъумчукъла», «Короче, неме», «Къайдан табылдыкъ»…

Араны таматасы Додуланы Жамиля бизге билдиргеннге кёре, быллай жумушла жаш адамланы ана тиллерине сейирлерин къурауда уллу магъананы тутадыла. Эришиу а эки кезиуге бёлюнюп бардырылгъанды. Аланы хар биринде да 6 рубрика бар эди. Биринчисинде жашла бла къызла миллет адабиятыбызны, нарт сёзлени, эльберлени, Ёзден адетни, халкъ жырларыбызны къалай билгенлерин кёргюзтгендиле. Экинчисинде уа фразеологизимлени суратлагъа къарап билгендиле, логика жаны бла чёрчекликлерин ачыкълагъандыла.

Алай бла, эришиуню эсеплерине кёре, малкъар маданиятны бла адабиятны билиуде биринчи Жабелланы Оксана башчылыкъ этген «Фринц зёрмеле» деген команда болгъанды (Педагогика колледж). Экинчи тизмеде Жаболаны Лаураны «Короче, менме» деген къаууму орналгъанды (КъМКъУ). «Доммакъгъа» Мисирланы Расулну «Малкъарлыла» деген эр киши командасы тийишли болгъанды (КъМКъАУ).

Оюнну къурагъанла аны тёрели этер муратлыдыла. Нек дегенде тилибизни сакълауда бла айнытыуда быллай тюбешиуде энчи магъана тутадыла.