Аны жарыкъ сыфаты эслеринден кетмейди

Кючменланы Таубий 1994 жылны 4 мартында Нальчикде туугъанды. 2011 жылда Хасанияны 16-чы номерли школун бошап, Белгородну экономика эм право университетини «юриспруденция» бёлюмюне киргенди. 2013 жылда аскерге чакъырылгъанды эмда Екатеринбург шахаргъа тюшгенди. 2015 жылда уа контракт бла Россейни Сауутланнган кючлеринде сержант чында къуллукъ этип башлагъанды. 
Юч жылдан а Таубийни Моздокга кёчюргендиле. Анда ол расчётну башчысыны орунбасары болгъанды. Дондагъы Ростовда Хорламны Парадына талай кере къатышханды, аны ючюн майдал бла да саугъаланнганды. Былтыр ол 503-чю гвардиялы мотострелковый полкга кёчюрюлгенди, андан аны энчи аскер операциягъа къатышыргъа жибергендиле. Жарсыугъа, ахшы умутлары алыкъа алда болгъан хайт деген жашны жашауу анда замансыз юзюлгенди. Жигитлиги ючюн ол Кишиликни ордени бла саугъаланнганды, ёлгенден сора. Аны атасы бла анасы, юй бийчеси, алыкъа жылчыгъы да толмагъан къызчыгъы къалгъандыла.
Таубий адамлада кертичиликни, огъурлулукъну, айтхан сёзюне ие болууну багъалагъанды. Юйюрюн бек сюйгенди, атасына бла анасына – Кючменланы Ибрагим бла Маржаннга, аммасы Ганифагъа татлы бала, эгечи Иринагъа ышангылы къарындаш болгъанды. Кёп болмай а кеси да Чочайланы Мариям бла юйюр къурагъанды, алагъа къызчыкъ да туугъанды. Чамны сюе, даулашны, не тюрлю болумну да кюлкюге айландыра, жарсыгъанны кёлюн кётюре билгенди. 
Юйдегиси Мариям айтханыча, Таубий чурумлагъа, къыйынлыкълагъа ышара тюбегенди. Жолда тюбеген адамны машинасына миндирип, юйюне жетдиргенди. Кесине тапсыз тюшсе да, болушлукъ этерге ашыкъгъанды. Эм сюйген ишлеринден бири уа жолоучулукъ болгъанды, жангы жерлени кёрюрге, билимине къошаргъа итиннгенди. Жууукъларыны, ахлуларыны эслеринде Таубийни жарыкъ, огъурлу, ышаргъан сыфаты къалгъанды.