«Донецкден сабийлени къууандыралгъаныбыз кёллендиреди»

«Бирлик» республикалы жамауат биригиу къуралгъанлы кёп заман озмагъанды, алай къысха кезиуню ичинде аны келечилери бир ненча жумуш толтургъандыла. Аланы эмда муратларыны юслеринден биз аны правленини таматасы, Герпегежни жер-жерли самоуправлениясыны депутаты Моллаланы Альберт бла ушакъ этгенбиз.

– Альберт, жамауат иш къыйынды, жууаплыды, артыкъ файда да келтирмейди. Аны бла кюреширге нек кёлленнгенигизни айтсанг  эди. 

– Былтыр эллени таматаларын эмда жер-жерли самоуправление органланы депутатларын айырыула болгъандыла. Герпегежни власть органларына жаш адамла келгендиле. Ол санда таматагъа Гузеланы Ибрагим тийишли кёрюлгенди.

Герпегежде къууанырча бир шарт  барды – жаш адамла элни жашауу ючюн жууаплы болгъанларын ангылагъандыла. Кир-кипчикден тазалау жумушладан артха турмайдыла, спорт, культура ишлеге, байрамлагъа тири къатышадыла. Депутатла да эл ючюн  къайгъыргъан жаш адамладыла.

Шёндю жаш тёлюню Ата журтубузгъа сюймекликге юйретиуге артыкъда уллу эс бурулгъаны баямды. Республикада энчи министерство да ачылгъанды. Аны эсге алып, жаш адамларыбызны онгларын бирикдирирге, бир ызгъа салыргъа, праволу кюч алыргъа деген мурат бла жамауат организацияны къурагъанбыз.

Атына «Бирлик» деп атагъанбыз, башчысы Биттирланы Жамбулатды, правленине таматалыкъ этеме. Ол Юстиция министерствода эсепге салыннганды. Аны башламчылары элни башчысы Гузеланы Ибрагим, мен, «Герпегеж» футбол команданы капитаны Атабийланы Алим, Черек районну администрациясында жаш тёлю политика жаны бла келечиси Биттирланы Жамбулат болгъанбыз.

Алгъаракълада уа жаш тёлюню ишлери жаны бла министр Азамат Люев бла тюбешген эдик. Ол жаш тёлю политикагъа кёз къарамын билдиргенди, бизни оюмларыбызгъа тынгылагъанды. Энтта Курортла эм туризм эмда Спорт министерствола бла да къурагъанбыз байламлыкъла, битеу жумушланы ала бла бирге бардырлыкъбыз.

– Мен билип, бу къысха заманда сиз бир ненча акция бардыргъансыз.

– Биринчиси КъМР-ни-100-жыллыгъын байрамлауну чеклеринде къуралгъанды. Анга аталып Акъ Къаягъа республиканы байрагъын чыгъарыу болгъан эди, аны къураугъа  Герпегежни администрациясы бла депутатлары жууаплы болгъандыла.

Андан сора жандауурлукъ акция бардыргъанбыз. Бюгюнлюкде битеу жамауатны эси энчи аскерчи операцияны барыууна бурулупду. Бизни элден жашла да къатышадыла анга. Ол къыйын болумладан къачхынчыла, бютюнда уа сабийле бек къыйналадыла. КъМР-ге Донецкден сакъат сабийле келгенлери белгили болгъанлай, аланы республиканы ариу жерлери бла шагъырей этерге кереклиси келгенди эсибизге.

Алагъа Черек районну туристле сюйген жерлерин кёргюзтюрге  оноулашабыз. Бу муратыбыз толгъанында Черек районну администрациясыны башчысы Къулбайланы Алан уллу болушлукъ этгенди, сау болсун. Ол  транспорт бергенди. УГИБДД-ны инспекторлары уа бизни ашырыуну къурагъандыла, къоркъуусузлукъну жалчытхандыла, алагъа да  ыразылыгъыбызны айтыргъа сюеме.

Сабийлени, ала 10-15-жыллыкъладыла, таулагъа киргенибизде  кёллериндегин айтып айтмазчады: асыры къарагъандан, башлары тёгерек айланнган болур. Ала къыйын, къоркъуулу болумлада жашагъандыла, саулукълары да осалды. Черек ауузну, тауланы деменгилиликлерин кёргенлеринде уа бир кесек абызырагъан, къоркъгъанча окъуна болгъандыла. Огъары Малкъаргъа кирген жерде тоннельни тийресинде тохтап, алайда ариулукъну кёргюзтгенбиз, бирге суратха  тюшгенбиз.

Ызы бла аланы таулу халкъны миллет ашлары бла  сыйлагъанбыз. Алайда эрттегили тау эллени да кёргюзтгенбиз.

Андан Чирик кёллеге да къайтханбыз. Къысхасы, сабийлени кюнлери къууанчдан толу эди. Быллай ариу жерлеге биринчи кере келгенлерин, тауланы жаланда суратлада кёргенлерин айтхандыла. Ала кеслеринде къоркъуулу болгъанын, быллай байрамла  жетишмегенин айтхандыла. Кюнню ахырында кёзчюклери жылтырап, жыякъчыкълары къызарып, бек ыразы эдиле.  Алагъа быллай къууанч бералгъаныбыз андан ары да ишлерге кёллендиреди.

– Мындан ары къаллай  жумушла тамамларгъа белгиленеди? 

– Башында айта келгенимча, организация жаш тёлюню юйретиу сферада ишлер мурат бла къуралгъанды. Аны себепли элледе патриот акцияла, жыйылыула, семинарла къураргъа белгиленеди. Бюгюнлюкде сабийле телефондан башханы кёрмейдиле, биз а ала туугъан журтубузну билселе, халкъларыбызны тарыхларын, адет-тёрелерин, динни танысала сюебиз.

Ишибизни кенгертирге, регионла аралы даражагъа чыгъаргъа кереклисин ангылайбыз. Дагъыда бюгюнлюкде къыралны ичинде туризм айнып барады. Къабарты-Малкъарны уа Элбрусдан башха жерлери да сейирдиле, тамашадыла. Россейлиле, тыш къыраллыла Черек районну билселе да магъаналыды. Аны ючюн бу жаны бла ишлерге, проектле къураргъа муратлыбыз. Шёндю да бир башламчылыгъыбыз барды: ол профессионал билимли гидлени, экскурсоводланы хазырлау бла байламлыды. 

Ушакъны Тикаланы Фатима бардыргъанды.
Поделиться: